БШУ-ны сайд Л.Цэдэвсүрэн оюутны хөгжлийн зээл болон боловсролын салбарын зарим асуудлаар мэдээлэл хийж, Засгийн газрын ээлжит хурлаар гаргасан шийдвэрүүдийг танилцууллаа.
Цар тахлаас үүдэн иргэдэд учирч буй санхүүгийн хүндрэлийг харгалзан мэргэжлийн чиглэл болон төрийн өмчит их, дээд сургууль байхаас үл хамааран 2.8 болон түүнээс дээш голч дүнтэй суралцаж буй 2020-2021 оны хичээлийн жилд хүсэлт гаргасан 5000 гаруй оюутанд оюутны хөгжлийн зээлийг олгохоор шийдвэрлэжээ.
Түүнчлэн сувилахуйн чиглэлээр суралцаж буй хувийн их, дээд сургуулийн оюутнуудыг сургалтын төлбөрийн хөнгөлөлтөд хамруулахаар боллоо. Тодруулвал ЭЕШ-ын 501 буюу түүнээс дээш оноотой, 2.8 болон түүнээс дээш голчтой суралцаж буй хувийн их, дээд сургуулийн сувилагчийн ангийн оюутнуудад буцалтгүй тусламжийг олгохоор нэмэлт өөрчлөлт оруулжээ. Мөн ЭЕШ-ын 450 дээш оноо авсан, одоогоор амжилттай суралцаж буй сувилахуйн чиглэлийн 1500 гаруй оюутанд энэ уг хөнгөлөлтийг үзүүлж байгаа гэлээ.