Дархан-Уул аймгийн Онцгой комиссоос зөвшөөрөлгүйгээр хулгайн замаар зорчсон иргэдийн тээврийн хэрэгслийг нь журамлаж, 14 хоног албадан тусгаарлахаар болжээ. Иргэдийг 14 хоног тусгаарлахад 700-900 мянган төгрөг зарцуулах бөгөөд энэхүү мөнгийг тухайн иргэнээр өөрөөр нь төлүүлэх юм байна. Дархан хот руу зөвхөн хүндэтгэх шалтгаантай, PCR шинжилгээ хийлгэсэн иргэдийг нэвтрүүлэх гэнэ.
Аймгийн Засаг дарга Б.Азжаргал “Аймгийн Онцгой комиссын даргын хувьд орж ирж болзошгүй хулгайн замыг газар дээр нь судалж үзсэн. Цаашдаа Хөтөл, Салхитын чиглэлийг судалж үзнэ. Шарын гол, Хонгорын чиглэлийн замын хувьд төмөр замын нүхэн гарцыг хаасан учраас харьцангуй гайгүй байна. Бид аж ахуйн нэгжүүдээ өнөөдрөөс хэвийн үйл ажиллагаанд нь оруулах шийдвэрийг гаргасан” гэлээ.