Энэ сарын 18-ны 06:00 цагаас эхлэн Улаанбаатар хотоос гарах хөдөлгөөнийг зогсооно. Харин зайлшгүй шаардлагатай буюу оршуулгын ажил, хүнс, шатахуун, эм, эмийн хэрэгсэл тээвэрлэж буй хөдөлгөөнийг хязгаарлахгүй аж.
Автотээврийн үндэсний төвийн зорчигч тээврийн тасгийн дарга Г.Дуламсүрэн “УОК-оос 2020 оны 11 дүгээр сарын 25-нд батлагдсан “Зорчигч тээврийг зохицуулах түр журам”-ын дагуу Улаанбаатарт гацсан иргэдийг гаргах ажлыг арванхоёрдугаар сарын 1-10-ны хооронд зохион байгуулсан. Гэвч зарим иргэний PCR шинжилгээний хариу гараагүй байсныг үндэслэн дээрх хугацааг энэ сарын 14-нийг хүртэл сунгасан юм. Өөрөөр хэлбэл журмын 2.8-д PCR шинжилгээ өгсөн боловч гарч амжаагүй иргэдийг арванхоёрдугаар сарын 14-18-ны 06:00 цаг хүртэл гаргах ажлыг зохион байгуулна гэж заасан.
Мөн журамд 2020 оны арванхоёрдугаар сарын 18-ны 06:00 цагаас Улаанбаатар хотоос гарах хөдөлгөөнийг зогсооно гэсэн өөрчлөлт орсон. Энэ дагуу маргааш өглөө хотоос гарах зорчигч тээврийн хөдөлгөөнийг зогсооно. Иргэд хувийн машинаараа ч хотоос гарахгүй гэсэн үг. Зайлшгүй шаардлагатай буюу буяны ажилтай, хүнс, шатахуун, эм, эмнэлгийн хэрэгслийн ачаа тээвэрлэлтийг явуулна. Бусад хөдөлгөөнийг хязгаарлана гэж ойлгох нь зүйтэй.
Энэ хязгаарлалт нь арванхоёрдугаар сарын 24-ний өдрийг хүртэл байна гэж түр журмын 2.7-д заасан байгаа. Коронавирусийн тархалтын улмаас хөл хорионд орж, Улаанбаатарт гацсан орон нутгийн иргэдийн ихэнх нь явсан.
PCR шинжилгээ өгсөн 100,000 иргэнээс 60,000 нь буцсан. Зарим аймаг руу автобус дүүргэлт багасаж, явах иргэд цөөрсөн. Өнөөдөр зорчигч тээврийн хамгийн сүүлийн автобус яваад хөдөлгөөн хаагдана. 2020 оны арванхоёрдугаар сарын 24-нөөс зорчигч тээврийн хөдөлгөөнийг хэвийн үргэлжлүүлэхээр төлөвлөж байна. Улаанбаатар руу ирж байгаа иргэдийг нэвтрүүлэх бөгөөд хэрэв халдвар бүртгэгдсэн аймгаас ирж байгаа бол PCR шинжилгээний бичгийг шаардана” хэмээн ярилаа.
ЭМЯ-наас өгсөн мэдээллээр өнөөдрийн байдлаар Сэлэнгэ, Дархан-Уул, Орхон, Дорноговь, Говьсүмбэр, Архангай гэсэн зургаан аймагт коронавирусийн халдварын батлагдсан тохиолдол бүртгэгдээд байна. Эдгээр аймгаас ирэх иргэдээс заавал шинжилгээний бичиг шаардах аж.