УОК-оос гаргасан шийдвэрийг Засгийн газрын Хэвлэл мэдээллийн албаны дарга Ц.Ганзориг танилцуулж байна. Тэрээр “ОХУ-тай хиллэж буй боомтуудад ажлын хэсэг ажилласан. Ажлын хэсэг санал дүгнэлтээ танилцууллаа. Алтанбулаг боомтыг өнөөдрөөс эхлэн хоёр сарын хугацаанд хаах санал гаргаж байна. Нийт 40 орчим тээврийн жолоочоос коронавирусийн халдвар илэрсэн. Нийтдээ 37 жолоочийг эмчлэх явцад ямар нэгэн эрсдэл үүсэж магадгүй гэсэн үүднээс хоёр сарын хугацаанд хаах саналыг гаргаж байна. Гэхдээ иргэдийн зорчих хөдөлгөөнийг хаахгүй. Баруун аймгуудаар хиллэж буй Боршоо, Тэс, Арцсуурь, Эрээнцав зэрэг боомтыг энэ сарын 16-аас эхлэн түр хугацаагаар хаах санал гаргаж байна. Харин Цагааннуур боомтыг гаригийн зохицуулалттайгаар хаах санал гаргасан. Маргааш эцэслэн шийдэгдэнэ” гэв.