Дугуй нь бүх замын дугуй, зуны дугуй, өвлийн дугуй гэсэн төрөлтэй. Хүмүүс бүх замын дугуйг дөрвөн улирлынх гэж андуурдаг. Бүх замын дугуй нь зуны улиралд хээний элэгдэл багатай. Харин өвлийн улиралд зохимжгүй. Манай улсад Япон улсаас дугуй ихэвчлэн орж ирдэг. Тийм учраас бүх замын дугуйг өвлийн улиралд ашиглах нь зохимжгүйгээс гадна, элэгдэл ихтэй, осол гарах магадлал өндөр юм. Бүх замын дугуй нь улирлаа дагаад үнэ нь үргэлж өөрчлөгдөж байдаг. Өвлийн улиралд арай хямд болдог бол зуны улиралд үнэ нь өсдөг. Бүхий замын дугуйг жийп, гэр бүлийн зориулалттай машин, хагас ачааны машинд л тавьдаг юм байна.
Харин өвлийн дугуйг хээний хувийг 70-аас дээшээ сонгох хэрэгтэй. Балруулан хээтэй учир зуны улиралд элэгдэл бага бөгөөд зам дугуйны барьцалдах чанар сайн байдаг. Шинэ дугуйны эдэлгээ нь гурваас дөрвөн жил байдаг. Харин хуучин дугуйны хувьд хамгийн дээд талдаа эдэлгээ нь хоёр жил л болдог байна. Өнөөдрийн байдлаар хамгийн их эрэлттэй байгаа дугуйнуудын үнийг сонирхуулъя.
Хуучин дугуйны үнэ:
195-65-10 хэмжээтэй дугуй 35000-50000 төгрөг
205-65-10 хэмжээтэй дугуй 70000-90000 төгрөг
Шинэ дугуйны үнэ:
195-65-10 400.000-500.000 төгрөг
205-65-10 700.000-800.000 төгрөг
“Өгөөмөр” захын дугуйны борлуулагч Х.Баттөр “Есдүгээр сараас арваннэгдүгээр сар хүртэл дугуйны худалдаа эрс сайжирдаг. Хүмүүс эртнээс машиныхаа бүрэн бүтэн байдлыг хангаж байгаа нь сайшаалтай байна. Худалдан авалт хийж байгаа хүмүүстээ зөвлөхөд азотын хийгээр өвлийн улиралд дугуйгаа хийлүүлэхгүй байсан нь дээр. Амортизоторт гамтай, зөөлөн болдог гээд хийлчихдэг. Өвлийн улиралд ингэхээр гадна дотроосоо хөлдчихдөг учир дугуй эдэлгээгүй болдог. Мөн боломжтой бол заавал шинэ дугуй авах хэрэгтэй. Ялангуяа өвлийн улиралд дугуй хамгийн чухал эрүүл мэнд, эд хөрөнгө, гэр бүлээ бодсон ч тэр. Бүр боломжгүй бол сайн судалж байгаад авах нь зөв. Ядаж л он болоод хээг нь сайн харах хэрэгтэй. Арван хүн тутмын хоёр нь л шинэ дугуй авдаг. Бололцоогүй байна гээд хямд дугуй авч байгаа. Үүнийгээ дагаад ч юм уу өвлийн улиралд осол их гардаг байх” гэж байлаа.
У.УРАНБИЛЭГ
