Нийслэлийн албан тушаалтнуудад сахилгын шийтгэл ногдуулсан болохыг Нийслэлийн Засаг даргын тамгын газрын /НЗДТГ/ Хяналт, шинжилгээ үнэлгээний хэлтсийн дарга Х.Гантулга, Хүний нөөцийн удирдлагын тасгийн дарга Б.Мөнгөншагай өчигдөр /2020.10.09/ мэдээллээ. Тодруулбал, НЗДТГ-ын даргын тушаалаар аравдугаар сарын 6-ны өдөр болсон Нийслэлийн Удирдах ажилтнуудын шуурхай зөвлөгөөн болсон бөгөөд хүндэтгэн үзэх шалтгаангүйгээр шуурхай зөвлөгөөнийг тасалсан гурван албан хаагч, дээд шатны байгууллагад хариуцлага тооцож эргэн мэдэгдэх чиглэлээр 16 албан хаагчдад албан бичгийг хүргүүлсэн байна.
Үүнээс зургаан албан тушаалтанд сануулах арга хэмжээ авч, хоёр албан хаагчийг ажлаас чөлөөлөх, 15 албан хаагчийн цалинг гурван сар 20 хувиар бууруулах сахилгын шийтгэл ногдуулжээ.
Ниийт 23 албан хаагчид захиргааны арга хэмжээ авсан бөгөөд үүнд НЗДТГ-ын хэлтсийн гурван дарга, Нийслэлийн өмч, төсөвт байгууллагын дөрвөн удирдлага, нийслэлийн өмчит аж ахуйн тооцоот үйлдвэрийн газрын долоон удирдлага, нийслэлийн хэрэгжүүлэгч агентлагийн дарга нарт тус тус арга хэмжээ авсан гэдгийг мэдээллээ. Авсан арга хэмжээ нь Төрийн албаны тухай хууль болон Хөдөлмөрийн тухай хуульд заасны дагуу сахилгын шийтгэлийг ногдуулсан аж.