Парис хотын Эйффелийн цамхагийн ойролцоох Хүний эрхийн талбайд БНХАУ-ын төр засгаас монгол, уйгар, төвөд зэрэг үндэсний цөөнхийн эсрэг болон Хонгконгод явуулж буй арга хэмжээг эсэргүүцсэн тайван цуглаан аравдугаар сарын 1-ний өдөр болжээ.
Цуглаанд Францад суралцаж, оршин сууж буй өвөр монголчуудын төлөөлөл оролцож, БНХАУ-ын Засгийн газар Өвөр Монголын өөртөө засах орны сургуулиудад хятад хэлийг нэгдүгээр ангиас нь заах шийдвэр гарган, есдүгээр сарын 1-нээс хэрэгжүүлж эхэлж байгааг эрс эсэргүүцэж буйгаа илэрхийлсэн байна.
Өмнө нь Өвөр Монголд нэгдүгээр ангидаа монгол хэлээ үзэж, хоёрдугаар ангиас хятад хэл үзэж байсныг ийнхүү өөрчилж, хос хэлний бодлого гэсэн өөрчлөлт хийх болсон нь унаган монгол хэлтнүүдийн хувьд үндэс угсаагаа язгуураар авч үлдэх хүсэлтэй нь зөрчилдөж байгааг жагсаалд оролцсон өвөрмонголчууд онцолж дэлхий нийтийн анхааралд хүргэх үүднээс энэ цуглаанд нэгдсэнээ ярьжээ.
Цуглаан болсон талбайд хүний эрх, эрх чөлөөний төлөө арга хэмжээ тогтмол байнга болдгоороо алдартай бөгөөд 1985 онд БНФУ-ын Ерөнхийлөгч агсан Франсуа Миттераны санаачилгаар Хүний эрхийн /Parvis desdroits de L’Homme / хэмээн тодотгон нэрлэдэг.