Европын хамгийн нэр хүндтэй тэмцээн болох Аваргуудын лигт Германы алдарт “Байерн Мюнхэн” клуб түрүүлсэн. Харин Европа лигт Испанийн “Севилья” түрүүлж, энэ тэмцээний дархан аварга гэдгээ баталсан билээ. Тэгвэл өнгөрсөн шөнө хоёр баг Европын Супер цом булаалдлаа.
Энэхүү тоглолтод “Байерн Мюнхэн” илүү байж, өрсөлдөгчөө 2:1-ээр буулгаж авснаар энэ улирлын 4 дэх цомоо хүртэв. Дотоодынхоо хоёр тэмцээн, Аваргуудын лигт түрүүлээд байсан бол ийн Супер цом нэмж байна. Тоглолтын 13 дахь минутад “Севилья” клубээс Окампос гоолдож, тооны харьцааг нээсэн. Харин 34 дэх минутад Горетцка тэнцүүлсэн юм. Үндсэн цагт хоёр баг 1:1-ээр тэнцсэн. Харин нэмэлт цагийн 104 дэх минутад Хави Мартинес гоолдож, багтаа ялалт авчирлаа.