Н.Номтойбаярыг цагдан хорих шийдвэр гаргажээ. Түүнийг ШШГЕГ-ын харьяа 461 дүгээр урьдчилан хорих анги руу авч явсан байна. Нийслэлийн прокурорын газраас Н.Номтойбаяр нарт Эрүүгийн хуулийн 21.2 дугаар зүйл /худал мэдүүлэх/-ийн 21.2-1, 22.1 дүгээр зүйл /Эрх мэдэл, албан тушаалын байдлаа урвуулан ашиглах/-ийн 22.1-3-д зааснаар яллах дүгнэлт үйлдэж ирүүлжээ. СЕХ-ны 2020 оны 05 сарын 25-ны 81 тоот “бие даан нэр дэвшигчийг бүртгэж, үнэмлэх олгох тухай” тогтоолоор Нямтайширын Номтойбаярыг Монгол Улсын Их Хурлын 2020 оны ээлжит сонгуулийн 29 дүгээр тойрогт буюу Нийслэлийн Хан-Уул дүүрэгт бие даан нэр дэвшигчээр бүртгэж баталгаажуулсан байдаг. Гэтэл өнөөдөр буюу 2020 оны 05 сарын 28-ны өдөр нэр дэвшигч Н.Номтойбаярыг Чингэлтэй дүүргийн эрүүгийн хэргийн анхан шатны шүүхээс шийдвэр гарч цагдан хорих шийдвэр гарсан. Энэ нь Улсын их хурлын сонгуулийн тухай хуулийн 35 дугаар зүйлд заасан “Нэр дэвшигчийн үйл ажиллагааны баталгаа” буюу зөрчил болон гэмт үйлдлийнх нь явцад, эсхүл хэргийн болон зөрчлийн газарт нотлох баримттай нь баривчилснаас бусад тохиолдолд нэр дэвшигчид холбогдуулан Сонгуулийн Ерөнхий Хорооны зөвшөөрөлгүйгээр эрүүгийн хэрэг хянан шийдвэрлэх болон зөрчил шалган шийдвэрлэх ажиллагаа явуулах, эрүүгийн хэрэг үүсгэх, баривчлах, саатуулах, албадан саатуулах, цагдан хорихыг хорих тухай заалтыг зөрчжээ.
Н.Номтойбаяр өөрийн цахим хуудаснаа “Чингэлтэй дүүргийн шүүгч намайг хорих шийдвэр гаргалаа. 461 хорих ангиас УИХ-ын сонгуульд Хан-Уулаас нэр дэвшээд гараад ирэхийг харъя гэж байгаа бололтой. Өнөөдрийн хуулийн байгууллага МАН-ын харуул хамгаалалтын алба шиг ажиллаж байгаа нь миний нэр дэвшиж байгаагийн нэг үндэслэл” хэмээн бичжээ.