Монголын хөлбөмбөгийн шигшээ багийн ахлагч Н.Цэдэнбал нэг өрөө байрны цалинтай таван жил тоглоод нэг өрөө байр авах гэрээг “Улаанбаатар Сити” клубтэй байгуулаад байсан юм. Гэвч клубийн зүгээс түүнийг хугацаанаасаа өмнө гэрээгээ цуцлахыг шаардаж, дарамталсан учраас тэрээр өөрийн хүсэлтээр гэрээгээ цуцлаад буй. Харин түүний 29 сарын хөдөлмөр үнэгүйдэж магадгүй нөхцөл байдал бий болчихоод байгаа аж. Энэ талаар түүнтэй ярилцлаа.
-Өнгөрсөн 29 сарын хугацаанд “Улаанбаатар Сити” клубийн зүгээс танд ямар нэгэн байдлаар мөнгөн урамшуулал олгож байсан тохиолдол бий юү?
-Анх 2017 онд “Улаанбаатар Сити” клубтэй гэрээ хийхдээ “Улаанбаатар Сити” клубт таван жилийн хугацаатай тоглоно. Цалин нэг өрөө байр” гэж тохиролцсон. Үүнээс гадна, хэрвээ “Улаанбаатар Сити” клуб Үндэсний дээд лигт түрүүлбэл 10 сая төгрөг, хоёрдугаар байрт орвол таван сая төгрөг, гуравдугаар байрт орвол гурван сая төгрөгийн урамшуулал олгоно гэж гэрээнд заасан байдаг. Өнгөрсөн 29 сарын хугацаанд “Улаанбаатар Сити” клуб Үндэсний дээд лигт түрүүлсэн учраас 10 сая төгрөгийн урамшууллыг авсан. Өөр, ямар ч мөнгө аваагүй. Уг нь миний байр “цалин” гэх тодотголтой явж байсан. Гэвч гэрээгээ цуцлах үедээ байрыг нь буцаан өгсөн.
-Таныг “Байраа суллаж өг” хэмээн дарамталсан гэсэн. Тэд таныг ямар хэлбэрээр дарамталсан бэ?
-Би Улаанбаатар Сити клубт тоглосон 29 сарын хугацаандаа ямар нэгэн байдлаар гэрээнд заасан зүйл заалтыг зөрчөөгүй, мөн ямар ч ёс зүйн алдаа гаргаагүй. Гэтэл багийн эзэн Г.Дашням өөрийнхөө сошиал хаягаар “байраа өгөөд багаас яв, гэрээг чинь цуцална шүү” гэх мэт үйлдлүүд, мессэжүүдийг олон удаа ирүүлж байсан. Мөн хуульч нь утсаар залгаад “Байраа хураалга, наад асуудал чинь Дашням та хоёрын хоорон дахь асуудал. Наад байр чинь гэрээнд ямар ч хамааралгүй” гэх мэтээр дарамталсан тохиолдол хэд хэдэн удаа гарч байсан.“Жи Мобайлыг ярьсангүй. Жи Мобайлтай холбоотой пост шейрлэсэнгүй. Чи зөвхөн хөлбөмбөгийн холбоогоо магтдаг, клубээ ерөөсөө ярьдаггүй” гэх зүйлсийг багийн удирдлагууд ярьдаг. Миний хувьд, боломж гарсан тохиолдолд аль алиныг нь л дурдаад, магтахыг хичээдэг байсан.
-Та “Улаанбаатар Сити” клубтэй байгуулсан гэрээнийхээ асуудлаар шүүхэд хандах боломжгүй болсон гэсэн. Яагаад ийм нөхцөл байдал бий болчихов?
-Шүүхээр заргалдахаар дор хаяж хоёр жилийн хугацаа зарцуулах шаардлагатай болно. Энэ хугацаанд хөлбөмбөг тоглох боломжгүй нөхцөл байдал үүснэ шүү дээ. Одоо би 32 настай. Тэгэхээр хоёр жилийн дараа дахин бэлтгэл хийгээд хөлбөмбөг тоглоно гэхэд маш хэцүү. Уг нь надад “Улаанбаатар Сити” клубтэй хийсэн гэрээгээ цуцлаад, өөр багт орсныхоо дараа энэ асуудлыг үргэлжлүүлэн шүүхээр заргалдъя гэсэн бодол байсан. Тэгээд багийнхаа удирдлагуудтай очиж уулзахдаа “Нэгэнт ийм нөхцөл байдал үүссэн учраас танай шаардлагыг хүлээж аваад нэг өрөө байрыг чинь буцааж өгье өө, би багаасаа гармаар байна, гэрээгээ цуцалж өгөөч” гэсэн албан бичгийг өгсөн. Тэд “Ийм албан бичгэнд манайх гэрээг чинь цуцлахгүй ээ.Харин чи, өөрийн хүсэлтээр багаас гарлаа, ямар нэгэн нөхөн төлбөр авахгүй, мөн гомдолгүй гэсэн өргөдөл бичээд өгчихвөл гэрээг чинь цуцалъя” гэсэн хариуг ирүүлсэн. Би тэдний шаардлагыг бодож үзээд, хүссэнийх нь дагуу өргөдөл бичиж өгөөд гэрээгээ цуцлуулсан. Гэрээгээ цуцлуулахын тулд “Би өөрийн хүсэлтээр багаас гарлаа, ямар нэгэн нөхөн төлбөр авахгүй, надад гомдол байхгүй” гээд өргөдөлдөө биччихсэн болохоор шүүхэд хандлаа гэхэд миний талд шийдэгдэх боломж маш хэцүү. Миний хувьд, Олон Улсын хөлбөмбөгийн холбоо болон Азийн хөлбөмбөгийн холбоонд хандах л боломж бий. Тиймээс эдгээр газрууд руу өргөдлөө явуулахаар төлөвлөж байгаа.Ийм асуудлаас хол байж л хөлбөмбөг хөгжинө.
-Та албан бичгээ Олон Улсын хөлбөмбөгийн холбоо руу хэзээ явуулах вэ?
-Би энэ сарын 9-нд “Улаанбаатар Сити” клубтэй хийсэн гэрээгээ цуцалсан. Өчигдөр л дараагийн клубтэйгээ гэрээгээ хийлээ. Тиймээс ирэх долоо хоногт албан бичгээ Олон улсын хөлбөмбөгийн холбоо руу илгээнэ ээ.
-Олон Улсын хөлбөмбөгийн холбоонд хандсан тохиолдолд уг маргаан таны талд шийдэгдэх магадлал хэр их байгаа гэж та үзэж байна вэ?
-Нарийн зүйлсийг яг сайн мэдэхгүй байна. Ямартаа ч олон улсын хөлбөмбөгийн холбоо руу явуулахаар бүх бичиг баримтуудаа орчуулаад бэлдчихсэн байгаа. Яаж шийдэхийг харж л байя.
-Таны гэрээнд “Хэрвээ хугацаанаасаа өмнө гэрээгээ цуцалсан тохиолдолд хэрхэх талаар” тодорхой тусгасан ямар нэгэн заалт байсан уу?
-Тийм заалт байгаагүй. Би анх маргаан үүсэхэд “Би ямар нэгэн байдлаар гэрээгээ зөрчөөгүй байхад яагаад намайг багаас гаргана, гэрээг чинь дуусгана гэж байгаа юм бэ, яагаад миний байрыг хураана гэж байгаа юм бэ, миний гэрээг цуцалсан юм уу, гэрээг маань цуцлаагүй бол би гэрээгээ шинэчилмээр байна, надад энэ асуудлаар тодорхой хариулт өгөөч ээ” гээд энэхүү хүсэлтээ албан бичгээр нэгдүгээр сарын 30-нд клубийн удирдлагад хүргүүлсэн. Энэхүү албан бичигтээ “Хоёрдугаар сарын 3-ны дотор надад хариу өгөөч ээ” гэж бичсэн боловч энэ хугацаанд ямар ч хариу өгөөгүй. Үүний дараа уулзъя гэсэн хүсэлтийг нэлээд хэдэн удаа тавьсан боловч уулзаагүй. Би хоёрдугаар сарын 5-нд Монголын хөлбөмбөгийн холбоонд, энэхүү асуудлыг шийдэж өгөөч ээ гэсэн хүсэлтийг хүргүүлсэн. Улмаар тэр өдөр анх олон нийтэд энэ асуудлаар мэдэгдсэн байгаа.
-Улаанбаатар Сити клубийн эзэн Г.Дашням Монголын хөлбөмбөгийн холбооны дэд ерөнхийлөгчийн албан тушаалыг хашдаг. Тэгэхээр Г.Дашням багийнхаа дотоод асуудалд ер нь оролцдог юм болов уу?
-“Улаанбаатар Сити” клубийн гүйцэтгэх захирлаар нь Р.Золбаярыг томилсон. Гэхдээ багийн эзэн нь Г.Дашням шүү дээ. Тэгэхээр шууд оролцохгүй гэсэн ч ямар нэгэн байдлаар багийнхаа дотоод асуудалд оролцох л байх гэж бодож байна. Г.Дашням өөрөө “Одоо би юу ч мэдэхгүй ээ. Золбаяртай учраа ол” гэх тайлбарыг өгч байна лээ.
-Та Золбаяртай уулзсан уу?
-Р.Золбаяртай уулзсан. Р.Золбаяр гэрээний нарийн асуудлыг мэдэхгүй л дээ. Г.Дашням л энэ асуудлыг шийдэх байх.
-Та өмнө нь гэрээгээ мэргэжлийн хуульчаар дүгнүүлж байсан уу?
-Би гэрээгээ хэд хэдэн хуульч нарт үзүүлсэн. Тэд хэлэхдээ, таны гэрээнд Монгол Улсын зарим хууль тогтоомж зөрчигдсөн заалтууд байна. Жишээ нь, гэрээнд байрны талаар ямар ч дэлгэрэнгүй мэдээлэл байхгүй. Хаана байгаа, ямар хэмжээтэй гэхчлэн тодорхой мэдээлэл байгаагүй. Байрны гэрчилгээний хуулбар нь байхгүй. Тэр байрны гэрчилгээ хэний нэр дээр байгаа талаар ч мэдээлэл алга байсан. Тэгэхээр энэ гэрээгээ нэн тэргүүнд шинэчилж, стандарт хангасан гэрээг хийх шаардлагатай гэсэн зөвлөгөөг хуульчид өгч байсан. Уг зөвлөгөөний дагуу, багийн удирдлагад гэрээгээ шинэчлэх шаардлагатай байна гэх хүсэлтийг тавьсан боловч, хариу ирүүлээгүй.
Би анх гэрээг хараад дутагдалтай зүйл олон байна гэж бодож л байсан. Гэхдээ Г.Дашнямыг “Магнай трейд” группийн захирлын хүү, мөн Жи мобайл гэх том компанийн захирал учраас нэг өрөө байран дээр янз бүрийн асуудал гаргахгүй өгчих байх гэж итгэж байсан.
-Тэр байрандаа суудаг байсан уу?
-Тэр байранд өнгөрсөн 29 сарын хугацаанд манай эгч байсан. Алтай хотхоны эсрэг талд байрлах “Тэлмэн” хотхоны байр. 29 м.кв хэмжээтэй байр байсан. Энэ сарын 9-ний өдөр суллаж өгсөн. Гэрээгээ цуцлаад л байраа суллаж өгсөн дөө.
-Энэ сарын 16-нд солилцоо наймааны цонх хаагдана. Уг давчуу хугацаа таныг гэрээгээ яарч цуцлуулахад нөлөөлсөн үү?
-Солилцоо наймааны цонх хаагдахаас өмнө “Улаанбаатар Сити”-гээс гарч чадахгүй бол дараагийн солилцооны цонх нээгдтэл өөр багт орж чадахгүй байх байсан. Тиймээс хугацаа давчуу байлаа. Би хөлбөмбөг тоглохыг хүсч байна. Энэ асуудлаас болж хөлбөмбөг тоглохгүй баймааргүй байна.
-Та дараагийн багтайгаа гэрээ байгуулж амжсан уу?
-Би өчигдөр Эрчим клубтэй таван жилийн гэрээг байгуулсан. Эрчим маш сайн бэлтгэл хийдэг баг. Би ойрын хоёроос гурван жилийн хугацаанд өндөр түвшинд тоглохын тулд маш сайн бэлтгэл хийдэг багт орох шаардлагатай. Эрчим клуб байнгын өндөр түвшний формтой байж чаддаг, сахилга бат сайтай баг.
-Цалингүй амьдарна гэдэг маш хэцүү шүү дээ. Өнгөрсөн 29 сарын хугацаанд ямар санхүүгийн эх үүсвэрээр амьдралаа залгуулж байсан бэ?
-Өнгөрсөн 29 сарын хугацаанд “Улаанбаатар Сити” клубийн төлөө хүчин зүтгэхдээ цалингүй л тоглосон. Би жижигхэн хувийн бизнес эрхэлдэг. Түүгээрээ л амьжиргаагаа залгуулж байлаа.
-Та “Улаанбаатар Сити” клубт хүчин зүтгэсэн хугацаандаа хэр сайн тоглосон гэж өөрийгөө дүгнэх вэ?
-“Улаанбаатар Сити” клуб байгуулагдаад дөрвөн жил л болж байна. Энэ богино хугацаанд Үндэсний дээд лигт түрүүллээ, мөн цомын тэмцээнүүдэд түрүүлсэн. Мөн анх удаагаа AFC Cup тэмцээнд оролцох эрхээ авсан. AFC Cup тэмцээнд оролцох нь Г.Дашнямын маш том зорилго байсан. Тиймээс миний хувьд, энэ багт тоглохдоо чамлахааргүй том амжилтыг гаргасан л гэж боддог.
У.ЧИНЗОРИГ