Монгол Улсын Ардчилсан, шинэ Үндсэн хууль батлагдсаны 28 жилийн ой, Монгол Улсын Үндсэн хуулийн өдөрт зориулсан хүчит 128 бөхийн барилдаанд Завхан аймгийн Яруу сумын харъяат, аймгийн заан М.Лхагвагэрэл түрүүлж, улсын өсөх идэр начин Ч.Хөхчирэнгэр үзүүрлэв.
Монгол бөхийн өргөөнд ням гаригт болсон тус барилдааны шөвгийн дөрөвт улсын харцага Б.Бат-Өлзий, улсын начин Э.Даш нар шалгарсан юм. Үндсэн хуулийн өдөрт зориулсан энэхүү бөхийн барилдаанд дархан аварга Б.Бат-Эрдэнэ хамгийн олон буюу дөрвөн удаа түрүүлсэн түүхтэй. Харин улсын гарьд И.Доржсамбуу гурван түрүү, дархан аварга А.Сүхбат, Г.Өсөхбаяр, улсын арслан Б.Ганбат нар тус бүр хоёр түрүү авч байжээ.