Бага насны хүүхдийг олон нийтийн газар авч явахгүй байх, амны хаалт байнга зүүхийг зөвлөж байна

Хамгийн сүүлийн байдлаар улсын хэмжээнд амбулаторийн нийт үзлэгийн 11,1 хувийг томуу, томуу төст өвчний шалтгаант үзлэг эзэлж, нийт хэвтэн эмчлүүлэгч 4 хүн тутмын нэг нь томуу томуу төст өвчнөөс шалтгаалжээ. Түүнчлэн Сэлэнгэ, Төв аймаг, Дундговь аймгийн Сайнцагаан суманд томуугийн өвчлөлийн улмаас хөл хорио тогтоогоод байна.

Сэлэнгэ, Төв аймаг, Дундговь аймгийн Сайнцагаан суманд хөл хорио тогтоосноор сурагчдын амралтыг хойшлуулж, олон нийтийн үйл ажиллагааг цуцалжээ. Улаанбаатар хотын хувьд амбулаторийн үзлэгийн 9,4 хувь орон нутагт 12,3 хувийг томуу томуу төст өвчний шалтгаант үзлэг эзэлж байна. Энэ жил өндөр хэмээр халуурч, ханиалгах шинж тэмдэг илэрдэг “В” хэв шинжийн вирус болон бага насны хүүхэд амархан уушгины хатгалгаа болтол хүндэрдэг амьсгалын замын синциталь вирус өргөн тархаад байна.

ДЭМБ-аас томуугийн халдвартай тэмцэх, урьдчилан сэргийлэх ажил зохион байгуулах зөвлөмж гаргасан. Үүнд томуугийн вакцин тариулах нь эхний алхам бол өдөр тутамдаа гараа байнга угаах, нүд хамар амандаа гараа хүргэхээс зайлсхийх, томуугийн халдвартай өвчтөнөөс хол байх, бие таагүй байвал гэртээ байх зэрэг алхмуудыг нэрлэжээ.

ХӨСҮТ-өөр дамжуулж томуугийн вакцинд 159500 хүн хамрагдсан. Дархлаажуулалтад хамрагдсан ч гэлээ тухайн вакцин тархалт өндөр 4 вирусээс л хамгаална. Тиймээс бага насны хүүхдэдээ дархлаа дэмжих тэжээллэг хоол хүнс өгөхийг зөвлөлөө.