Улсын хэмжээнд өнөөдрийн байдлаар 194 мянга гаруй хуулийн этгээд бүртгэлтэй байдаг бөгөөд эдгээр хуулийн этгээд 2021 оны нэгдүгээр сард багтан өмнөх эцсийн өмчлөгчөө бүртгүүлэх ёстойг Улсын бүртгэлийн ерөнхий газраас мэдээллээ. Эцсийн өмчлөгчийг бүртгэж байгаа нь ирэх оны I сарын 1-нээс хэрэгжиж эхлэх Татварын багц хуультай холбоотой юм байна.
Хуулийн этгээдийн эцсийн өмчлөгч гэдгийг тухайн аж ахуйн нэгжийн хувьцааны дийлэнх хэсгийг дангаараа болон бусадтай хамтран эзэмшиж, үйл ажиллагааг урьдчилан чиглүүлж, ашиг шимийг хүртэж буй этгээдийг ойлгох аж. Эцсийн өмчлөгчөө худал ташаа мэдүүлбэл Эрүүгийн болон Зөрчлийн хуулиар хариуцлага хүлээлгэнэ.