Төв аймгийн Заамар сумын Хайлааст багийн нутаг дэвсгэр Баянголын ам гэх газарт үйл ажиллагаа явуулдаг “Эко-Алтан Заамар” компанийн ажлын талбайд осол гарч нэг ажилтан амиа алджээ. Тодруулбал, өнөөдөр 13 цагийн орчимд экскаватор угсрахаар кранаар өргөх явцад трос тасарч тус компанийн ажилтан 26 настай залуугийн дээр унасан байна. Улмаар 26 настай залуу газар дээрээ амиа алдсан харамсалтай осол гарчээ.
Өмнө нь энэ оны хоёрдугаар сарын 28-нд уурхайн карьерийн хана хэсгээс их хэмжээний шороо нурж, зургаан хүн болон техник, тоног төхөөрөмж дарагдсан. Осол болсон даруйд хоёр иргэнийг эсэн мэнд гарган авч, эмнэлгийн тусламж үзүүлсэн бөгөөд дөрвөн ажилтан шороонд дарагдаж амь насаа алдаж байсан юм.