УИХ дахь МАН-ын бүлгийн хурлаар Үндсэн хуульд оруулах нэмэлт, өөрчлөлтийн төслийг хэлэлцжээ. Тус бүлгээс Үндсэн хуульд оруулах нэмэлт, өөрчлөлтийн төслийг гуравдугаар хэлэлцүүлгээр батлахаар санал нэгдсэн бөгөөд бүлгийн дарга, УИХ-ын гишүүн Д.Тогтохсүрэн, “УИХ-д энэ оны зургаадугаар сард өргөн мэдүүлсэн Үндсэн хуульд оруулах нэмэлт, өөрчлөлтийн төслийн гуравдугаар хэлэлцүүлэг энэ долоо хоногт болно. АН-аас Ерөнхий сайд танхимаа өөрөө бүрдүүлэх, танхимын гишүүдээ огцруулах, чөлөөлөх асуудлыг шийддэг байх санал ирүүлснийг манай бүлэг дэмжсэн. Мөн сонгуулийг холимог тогтолцоогоор явуулах саналыг ч дэмжлээ. Гэхдээ үүнийг 2024 оноос хэрэгжүүлэх нь зөв гэж үзсэн. Харин Ерөнхийлөгчийг УИХ-аас томилдог байх саналыг эцэслэн шийдсэнгүй. Уг асуудлыг зөвшилцлын ажлын багийн хурлаар дахин хэлэлцэх юм. Хэрэв энэ саналыг дэмжсэн тохиолдолд 2025 оноос хэрэгжүүлэх нь зөв” гэжээ.