ОХУ-ын Холбооны аюулаас хамгаалах албаны хил хамгаалах газраас Умард Солонгосын 80 иргэнийг саатуулсан талаар мэдээлжээ. Уг хэрэг өчигдөр гарсан байна.
Тус албаныхан тэнгисийн биологийн нөөцийг хамгаалах арга хэмжээний үеэр ийн илрүүлжээ. Хулгайгаар загасчилж байсан тэднийг саатуулах үеэр эсэргүүцэн гал нээжээ. Энэ үеэр Оросын гурван хилчин шархадсан байна. Оросын хил хамгаалагчид Умард Солонгосын загас агнуурын хоёр хөлөг, 11 моторт завийг саатуулсан аж. Хууль бусаар хил зөрчин загас агнах асуудал нэг бус удаа гарч байжээ.
Хамгийн сүүлд өнгөрсөн долдугаар сард Умард Солонгосын тал 15 хүнтэй Оросын загас агнуурын хөлгийг саатуулаад суллаж байжээ. Болсон явдалтай холбогдуулан БНАСАУ-ын хэргийг түр хамаарагч Жин Жонг Хёпийг ОХУ-ын гадаад хэргийн яаман дээр дуудсан байна. Жин Жон Хёп хэвлэл мэдээллийн хэрэгслийнхэнд тайлбар хийхээс татгалзжээ.