Будапештаас Берлин рүү их хэмжээний эм тээвэрлэж яваад баригдсан Монгол улсын хоёр иргэний шүүх хурал явагдаж байна. Шүүхийн шийдвэр ирэх долоо хоногт гарах ажээ.
Хэргийг тодруулбал, 2018 оны арванхоёрдугаар сард нэг бүр нь дөрвөн еврогийн үнэтэй 150,000 ширхэг өвчин намдаах эмийг 53 настай Т.Мөнхбат, 38 настай Э.Оргил нар дипломат дугаартай автомашинаар тээвэрлэж яваад Дрезден хотын ойролцоо хурдны зам дээр саатуулагдсан байна. Т.Мөнхбат нь ОХУ-ын Улаан Үүд хот дахь Монгол улсын ерөнхий консулын газрын худалдааны атташе гэнэ. Харин машиныг жолоодож явсан Э.Оргил нь дипломат албанд ажилладаггүй, бөө хүн болохыг мэдээлжээ.
Тэд Будапештаас таньдаг хүнийхээ илгээмжийг Берлинд хүргэхээр авч явсан, дотор нь юу байгааг мэдээгүй гэж мэдүүлсэн байна.
Мөн өнгөрсөн тавдугаар сард Монгол улсын хоёр дипломат ажилтан 70 кг героин тээвэрлэж яваад баригдсан хэрэг гарсан. “Дээрх хоёр хэргийн хооронд ямар нэг хэлхээ холбоо илрээгүй” гэж хэргийг мөрдөн шалгаж байгаа прокурор мэдэгджээ. Героин тээвэрлэж явсан Истанбулын консулын хоёр ажилтны хэргийг шалгаж дууссан бөгөөд шүүх хурлын тов гараагүй байгаа гэнэ.