УИХ дахь АН-ын зөвлөлийн хуралдаан өндөрлөлөө. Хуралдаанаар хэлэлцсэн асуудлын талаар УИХ дахь АН-ын зөвлөлийн дарга Д.Эрдэнэбат:
-АН-ын зөвлөлийн хуралдаанаар хоёр үндсэн асуудал хэлэлцлээ. Нэгдүгээрт, Үндсэн хуулийн өөрчлөлттэй холбогдуулан байр сууриа нэгтгэлээ. Эрх баригчид ирэх баасан гаригаас Үндсэн хуулийн нэг дэх хэлэлцүүлгийг хийхээр шийдсэн байна.
АН-ын зөвлөл 2017 оны долдугаар сарын 31-ний өдөр мэдэгдэл гаргасан. Энэ мэдэгдэлдээ, Ардчилсан Үндсэн хууль ардчиллыг бэхжүүлэхэд чухал үүрэг гүйцэтгэснийг дурдаад, өөрчлөх цаг үеийн шаардлага байгаа гэж тэр үед мэдэгдэж байсан. Харин өөрчлөлт хийхдээ “Үндсэн хуулийг хэлэлцэхэд ард нийтээс санал авах ёстой. Үндсэн хуулийг хэлэлцэхээс өмнө УИХ-ын нэр хүндийг унагаагаад байгаа зүйлийг шийдэх, ардчиллын байр суурийг баримтлахаа илэрхийлсэн. Өнөөдөр ч бидний энэ шаардлага хэвээр байгаа.
Үндсэн хуулийг өөрчлөхдөө үнэмлэхүй олонхийн шийдлээр явах нь эргэлзээтэй. Ард нийтээс санал асуулга авах шаардлага тавьж байсан бол бид өнөөдөр ард нийтээрээ батлаарай гэж байгаа. Энэ Үндсэн хууль сөрөг хүчингүй батлагдах магадлал өндөр байгаа. Үндсэн хуульд орж байгаа үг өгүүлбэр, цэг таслал бүрийг хянах ёстой. Ялангуяа Ерөнхийлөгчийн саналыг авсан уу гэдэг нь анхаарал татаж байгаа. Нэгэнтээ үнэмлэхүй олонхиороо хэлэлцэж байгаа учир АН оролцож, байр сууриа илэрхийлэх нь зүйтэй гэж үзэж байна.
ОУПХ-ны тэргүүнтэй анх удаа бид уулзаж, Г.Батхүүгийн асуудлаар хамтарч ажиллах санал тавьсан. Хүний эрхийн хорооны зөвлөл ирсэн. АН С.Зориг агсны хэргийг илрээсэй, зөв шийдээсэй гэсэн байр суурь дээр байсан. Үнэхээр энэ хэргийг замруулах вий гэж болгоомлжол бидэнд байгааа. С.Зориг агсны хэргээр эрх баригчид хоёр удаагийн сонгууль хийсэн. Энэ удаа бас давтагдах вий гэж болгоомжилж байна.
Г.Батхүү агсны асуудал мөрдөн байцаах шатанд явж байна. Асуудлыг битүү байдлаар шийдэх хэмжээнд явж байна. Тийм учраас энэ хэрэг дахин нотлогдохгүй зүйл рүү орчих вий. Шинжилгээгээр тархины цус харвалт болоогүй, зүрх нь зогсоогүй гэдэг нь нотлогдсон. Тиймээс бид ОУПХ-ны Хүний эрхийн хороонд өргөдөл гаргасан. Тиймээс энэ асуудал УИХ дахь АН-ын зөвлөлийн анхааралд байх болно гэлээ.
Тэрбээр мэдээлэл хийснийхээ дараа сэтгүүлчдийн асуултад хариулав.