Хятадын “HUAWEI” компанийн шинэ загвар болох Р30 гар утсыг Японы зах зээл дээр худалдаалахыг түр хойшлуулсан талаар тус улсын үүрэн холбооны хоёр компани өнөөдөр зарлажээ.
Softbank болон KDDI компаниуд баасан гарагаас эхлэн уг загварын утсыг худалдаалах гэж байсан юм.
Softbank компанийн зүгээс P30 загварыг хүмүүсийн хэрэгцээ шаардлагад бүрэн нийцэж чадах эсэхийг шалгаж, нягтлах хэрэгтэй болсон тул хойшлуулсан хэмээн байр сууриа илэрхийлжээ. Гэхдээ “Google”-ийн Андроид систем шинэ гар утсанд цаашдаа ажиллах эсэх нь эргэлзээтэй болсноос үүдэн хойшлуулахад хүрсэн байх магадлалтай аж.
Тэгвэл Японы хоёр дахь том үүрэн холбооны оператор KDDI ийнхүү хойшлуулах болсон шалтгаанаа мөн л АНУ-ын зүгээс “HUAWEI” компанид тавьсан хоригтой холбон тайлбарлажээ.
“HUAWEI” компани P30 загварын утсаа баасан гарагаас эхлэн Японы зах зээлд борлуулах болсноо мөн тус улсад одоо байгаа нэрийн долоон дэлгүүр дээрээ нэмж 20 үйлчилгээний цэг байгуулах төлөвлөгөөтэй байгаагаа өчигдөр Токио хотод болсон хэвлэлийн хурлын үеэр зарлаад байсан билээ.
А.МӨНХЗУЛ