Хүний эрхийг хамгаалагчийн асуудал хариуцсан Нэгдсэн үндэстний байгууллагын тусгай илтгэгч Мишель Форстыг өнөөдөр Монгол Улсын Ерөнхийлөгч Х.Баттулга, Монгол Улсын Ерөнхийлөгчийн Иргэний нийгэм, хүний эрхийн бодлогын зөвлөх Г.Уянга нар хүлээн авч уулзав.

Тусгай илтгэгч М.Форст нь тавдугаар сарын 13-ны өдрийг хүртэл Монгол Улс дахь хүний эрхийг хамгаалагчийн нөхцөл байдалтай танилцаж зөвлөмж гаргах бөгөөд энэ хүрээнд УИХ, Засгийн газар, Захиргааны хэргийн шүүх, Улсын Ерөнхий прокурор зэрэг газрын удирдлагуудтай уулзаж, мөн орон нутагт ажиллахаар төлөвлөжээ.

Ноён М.Форст дээрх газруудад ажиллаж нөхцөл байдалтай танилцсаны дараа Монгол Улс дахь хүний эрхийн хамгаалагчийг тойрсон асуудал, хууль эрх зүйн орчин ямар байгаа талаарх урьдчилсан зөвлөмжийг Засгийн газар болон Монгол Улсын Ерөнхийлөгчид хүргүүлж, дэлгэрэнгүй зөвлөмжөө НҮБ-ын Хүний эрхийн зөвлөлийн 43 дугаар хуралд танилцуулах талаараа ярив.

Мөн Монгол Улсад хүний эрхийн хамгаалагчийн асуудал муу биш ч сайжруулах боломжтой талаар, Хүний эрхийн хамгаалагчийн эрх зүйн байдлыг дээшлүүлэх асуудлаар Монгол Улсын Ерөнхийлөгч Х.Баттулгатай санал солилцов.

С.Зоригийн амь насыг хөнөөсөн хэргийг шийдвэрлэсэн асуудлаар Олон улсын парламентын холбооны удирдах зөвлөлөөс ирүүлсэн шийдвэрийг судалж, холбогдох санал, дүгнэлт боловсруулах үүрэг бүхий Түр хорооны дарга Ж.Батзандан, тус түр хорооны гишүүн Л.Болд нар НҮБ-ын хүний эрхийг хамгаалагчдын нөхцөл байдлын асуудлаарх тусгай илтгэгч Мишель Форстыг хүлээн авч уулзлаа.

Уулзалтын эхэнд Мишель Форст Хүний эрхийг хамгаалагчидтай уулзаж, Монгол улсад тэдэнд учирдаг нөхцөл байдлыг тандан мэдэх, тэднийг хэрхэн дэмжиж болохыг судлах зорилгоор ирсэн гэдгээ онцолж, УИХ-ын гишүүн Ж.Батзанданг Түр хорооны даргаар томилогдсонд баяр хүргэсэн юм. Мөн хүний эрхийн асуудалд УИХ, УИХ-ын гишүүд онцгой анхаарч байгаад талархаж байгаагаа илэрхийллээ.УИХ-ын гишүүн Ж.Батзандан С.Зориг агсны амь насыг хөнөөсөн гэж хилсээр хэрэг хүлээлгэсэн, эрүүдэн шүүсэн болон бусад хүний эрхийг зөрчсөн ноцтой нөхцөл байдал үүссэн тухай тэдэнд танилцуулсан юм. Түр хорооны нэг чухал үүрэг бол уг хэргийн илрүүлэлтэд хүний эрхийг зөрчсөн нэг ч үйлдэл гарах ёсгүй гэдгийг хэлээд үүнд онцгой анхааран ажиллах болно гэдгээ тодотгосон юм. Мөн хүний эрхийн асуудал ноцтой хөндөгдөж байгаа чухал цаг үед манай улсад айлчилж байгаад талархаж байна гэсэн юм.

Мишель Форст хүний эрхийн нөхцөл байдал Монголд ямар байгаа тухай айлчлалын үеэр авсан ажиглалт, мэдээллээ 5-р сарын 13-нд албан ёсоор танилцуулах юм байна. Харин айлчлалын бүрэн тайланг 2020 оны 3-р сард НҮБ-ын Хүний Эрхийн Зөвлөлд танилцуулна гэдгээ уулзалтын төгсгөлд онцоллоо хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.