Японы нийслэл Токио хотноо 2020 онд Олимпын наадам болон Паралимпын наадмыг зохион байгуулах ажлыг хариуцсан сайд Ёшитака Сакүрадаг лхагва гарагт огцорсны дараа уг албан тушаалд Сюнъити Сүзүкиг дахин томилсон байна. Тэрбээр энэ албан тушаалыг 2017-2018 онд хашиж байжээ. Энэ тухай Японы Ерөнхий сайд Шинзо Абэ пүрэв гарагт сэтгүүлчдэд мэдээллээ.
“Тэрбээр олон нийтийн итгэлийг сэргээж, Олимпын наадмыг амжилттай зохион байгуулаасай гэж би хүсэж байна” хэмээн Абэ цохон тэмдэглэсэн байна.
Сакүрада утга агуулгын хувьд зохисгүй хэд хэдэн мэдэгдэл хийснийхээ хариуцлагыг хүлээж огцорсон юм. Тэрбээр өмнө нь эрх баригч Либерал ардчилсан намын гишүүн Хинако Такахашид зориулсан арга хэмжээний үеэр “хатагтай Такахаши бол 2011 оны газар хөдлөлт болон цунамид өртсөн бүс нутгуудыг сэргээн босгох ажлаас чухал хүн юм” гэж мэдэгджээ. Харин Такахаши нь байгалийн гамшигт хамгийн их өртсөн Ивата мужийн хүн аж.
Сакүрадагийн мэдэгдлүүд нь олон нийт болоод сөрөг хүчний намын шүүмжлэлд ихээхэн өртжээ. Тэрбээр 2011 оны байгалийн гамшигт өртсөн хүмүүсийн ар гэрийнхнээс олон нийтийн өмнө уучлалт хүсэхээс аргагүйд хүрсэн юм.
Сакүрада урьд нь мөн хэд хэдэн удаа иймэрхүү мэдэгдэл хийж байжээ. Тухайлбал, Олимпын хөдөлгөөний гол зарчмыг тодорхойлсон Олимпын Харти-г уншаагүй гэж хэлсэн байна. Тэрбээр мөн Японы Засгийн газарт кибер аюулгүй байдлын асуудлыг хамтран хариуцдаг боловч суурин компьютер ашиглаж чаддаггүй гэж өнгөрсөн оны 11 дүгээр сард мэдэгдэж байжээ.