Монгол Улсын Ерөнхийлөгч Х.Баттулга өнөөдөр Азийн хөгжлийн банк (АХБ)-ны Зүүн Азийг хариуцсан Ерөнхий захирал Эйми Леунг болон АХБ-ны Монгол дахь Суурин төлөөлөгч Ёланда Фернандез Ломмен нарын төлөөлөгчдийг хүлээн авч уулзлаа.

Уулзалтын эхэнд Монгол Улсын Ерөнхийлөгч Х.Баттулга АХБ нь Монгол Улсад үйл ажиллагаа явуулж байгаа олон улсын санхүүгийн байгууллагуудаас хамгийн идэвхтэй, санхүүжүүлсэн төсөл, хөтөлбөр болон санхүүжилтийн тоо хэмжээгээр тэргүүлдэг талаар дурдаад Монгол Улсын бодит бүтээн байгуулалтад үнэтэй хувь нэмэр оруулсанд нь талархал илэрхийлсэн юм.

Өнөөдрийн уулзалтаар Монгол Улсын Ерөнхийлөгч Х.Баттулга дэд бүтэц, тэр дотроо төмөр замын төслүүд, эрчим хүч, барилга хот байгуулалтын зарим төслүүдийн талаар мэдээлэл өгч, АХБ-ны төлөөлөгчидтэй санал солилцлоо.

АХБ-ны Зүүн Азийг хариуцсан Ерөнхий захирал Эйми Леунг төсөл, хөтөлбөрүүдийн талаар мэдээлэл авсныхаа дараа Зүүн хойд Азийн бүс нутгийн нэгдсэн сүлжээг бэхжүүлэх асуудалд санаачилга гарган ажиллаж байгаад онцгойлон талархал илэрхийлж, энэ нь Монгол Улсын хөгжилд алсын хараатай бодлого болохыг цохон тэмдэглэлээ.

Мөн хатагтай Эйми Леунг АХБ-ыг төлөөлөн цаашид Зүүн хойд Азийн бүс нутгийн нэгдсэн сүлжээний стратегийг дэмжиж ажиллахаа бүрэн дүүрэн илэрхийлж, олон төсөл, хөтөлбөрүүдийн талаар дэлгэрэнгүй мэдээлэл авч, ярилцах завшаан олгосон явдалд талархал илэрхийлэв.

Монгол Улсын Ерөнхийлөгч Х.Баттулга өнөөдөр Азийн хөгжлийн банкны Монгол дахь суурин төлөөлөгч Ёланда Фернандез Ломмэнийг хүлээн авч уулзав.

Хатагтай Ёланда Фернандез Ломмэн 2016 оноос Монгол дахь суурин төлөөлөгчөөр ажиллаж байгаа бөгөөд 2001 оноос Монгол Улстай холбоотой ажилласан. 2001 оноос хойш Монгол асар хурдацтай хөгжиж буйг тэмдэглэв. Мөн өмнөх суурин төлөөлөгчидтэй Монгол Улсын Ерөнхийлөгч Х.Баттулга УИХ-ын гишүүн болон Засгийн газрын гишүүн байхдаа үр дүнтэй хамтран ажилладаг байсан гэдгийг тэмдэглэлээ.

Азийн хөгжлийн банк нь Монгол Улстай хамтран ажиллах шинэ стратеги боловсруулж байгаа юм байна. Уг стратеги нь хэд хэдэн тэргүүлэх чиглэлтэй бөгөөд эдийн засгийг төрөлжүүлэх, ажлын байрыг олноор нэмэгдүүлэх, төрийн үйлчилгээг иргэдэд илүү үр дүнтэй хүргэх зэрэгт нэн түрүүнд анхаарч буйг Азийн хөгжлийн банкны Монгол дахь суурин төлөөлөгч Ёланда Фернандез Ломмэн хэллээ.

Мөн хөдөөгийн хөгжлийг дэмжих, жижиг, дунд үйлдвэрлэлийг дэмжих, ХАА-н боловсруулах салбарыг дэмжин хөгжүүлэх, иргэдийн орлогыг дээшлүүлэх, боловсрол, эрүүл мэндийн салбарыг шинэчлэн хөгжүүлэх зэрэг төсөл, хөтөлбөрүүдийг хэрэгжүүлэхээр төлөвлөж байгаа аж.

Хөгжлийн бэрхшээлтэй иргэдийг дэмжих, ингэхдээ уламжлалт аргаар зөвхөн эмнэл зүйн талаас дэмжих бус, ажлын байр, хэвийн ажиллаж амьдрах боломжоор хангах зорилго бүхий төслийг Монгол Улсад анх удаа хэрэгжүүлэхээр болжээ.

Монгол Улсын Ерөнхийлөгч Х.Баттулга Азийн хөгжлийн банк нь Монгол Улс шилжилтийн үеийг даван туулахад ихээхэн тусламж дэмжлэг үзүүлснийг тэмдэглээд түүнийг Зам, тээврийн сайд байх үед Улаанбаатарыг 21 аймагтай холбох хатуу хучилттай замын зургийг Азийн хөгжлийн банктай хамтран хийж, сүүлийн 3-4 жилд авто замууд эрчимтэй баригдан хөдөө орон нутаг, нийслэлийн хооронд зорчиход илүү хялбар болсон хэмээлээ.

Мөн Монгол Улс эдийн засгийн хувьд нэг зах зээлээс хараат байдлаа өөрчилж, Зүүн Азийн орнууд руу зах зээлийн гарц нээх талаар Владивостокт болсон Дорнын эдийн засгийн чуулганы үеэр зарим улс орны удирдагчидтай үр дүнтэй уулзалт яриа хийсэн тухайгаа Монгол Улсын Ерөнхийлөгч Х.Баттулга тэмдэглэлээ.