Засгийн газрын хуралдаанаар нийслэлийн удирдлагын бүтэц орон тоотой холбоотой асуудлыг хэлэлцлээ. Улмаар нийслэлийн Засаг дарга бөгөөд Улаанбаатар хотын захирагч нь Хөгжлийн бодлого, Хүний хөгжил, нийгмийн бодлого хариуцсан хоёр орлогчтой байхаар өөрчилжээ. Мөн Хот байгуулалт, Инноваци, технологи, Агаар, орчны бохирдол, Зам, тээвэр хариуцсан төсөл, хөтөлбөрийн удирдагчдыг Засаг даргын орлогчтой дүйцэх түвшинд ажиллуулах юм байна. Харьяа 33 агентлагийн хоёрыг нь нэгтгэн, хоёрыг нэмж 34 агентлагтай байхаар тогтжээ. Хотын тулгамдсан асуудлыг шийдвэрлэх зорилгоор Замын хөдөлгөөний төлөвлөлт, зохицуулалт, инженерчлэлийн газар болон Хотын стандарт, орчны аюулгүй байдлын хяналт, зохицуулалтын газрыг шинээр байгуулж байгаа юм байна. Нийслэлийн Засаг даргын Тамгын газрын орон тоог 129, Захирагчийн ажлын албыг 55, БЗД, СХД тус бүрт 68, БГД, СБД, ХУД, Чингэлтэй дүүрэгт тус бүр 59, Багануур, Налайх дүүрэгт тус бүр 39, Багахангай дүүрэгт 25 хүртэл байхаар тогтоожээ.