“Оюутан цэрэг” хөтөлбөрийн бүртгэл ирэх гуравдугаар сарын 1-нээс эхэлнэ. Уг хөтөлбөрийг манай улсад хэрэгжүүлж эхлээд зургаан жил болж байгаа юм. Өнгөрсөн хугацаанд 5000 гаруй залуус “Оюутан цэрэг” хөтөлбөрт хамрагджээ.
Энэ хөтөлбөр хэрэгжсэнээр Монгол Улсын их, дээд сургуулийн оюутнуудыг суралцах хугацаанд нь цэргийн эрчимжсэн сургалттай тусгай хөтөлбөрөөр цэргийн сургуульд хамруулан цэргийн алба хаалгах бололцоог бүрдүүлж буй юм. Мөн эх орноо батлан хамгаалах, төрийн алба хаших, эрүүл чийрэг, бие бялдар, сэтгэл зүйн болон цэргийн бэлтгэлтэй залуусыг олшруулж, улс орныг батлан хамгаалах чадавхийг сайжруулан дайчилгааны бэлтгэл үүрэгтний нөөцийг хангахад уг хөтөлбөрийн зорилго чиглэгддэг.
2014 оноос хэрэгжиж эхэлсэн “Оюутан цэрэг” хөтөлбөрийн хүрээнд Монгол Улсын их, дээд сургуулийн бакалаврын ангид суралцаж байгаа оюутнуудад сайн дурын үндсэн дээр “Цэргийн ерөнхий бэлтгэл” хичээлийг хоёр кредит, 96 цагаар сонгож судлуулдаг бөгөөд шаардлага хангасан оюутан залуусыг 12 кредит, 560 цагийн “Цэргийн тусгай бэлтгэл” сургалтад хамруулж, цэргийн алба хаадаг юм.
Энэ жилийн “Оюутан цэрэг” хөтөлбөрт хамрагдах оюутнууд дараах материалыг бүрдүүлэх шаардлагатай юм байна.
-Иргэний үнэмлэх
-Цэргийн үүрэгтний үнэмлэх
-Оюутны үнэмлэх
-Эрүүл мэндийн даатгалын дэвтэр /сүүлийн жилийн даатгал төлөгдсөн байх/
-Сургуулийн тодорхойлолт “Оюутан-цэрэг’ сургалтад хамрагдах зөвшөөрөл/
-Сурлагын дүнгийн хүснэгт /сурлагын голч дүн 2.8 аас дээш байх/
-Сургалтад хамрагдахыг хүссэн өргөдөл