С.Эрдэнэ: Үндэсний аюулгүй байдлын үзэл санааг гартаа барьж байдаг гурван хүн дархлаатай байх ёстой

УИХ-ын гишүүн С.Эрдэнэ сэтгүүлчдийн асуултад хариуллаа.

---

-Монгол Улсын Ерөнхийлөгчөөс өргөн мэдүүлсэн УИХ-ын Дэгийн тухай хуульд өөрчлөлт оруулах хуулийн төслөөр та ямар байр суурийг илэрхийлэх вэ?

-Монгол Улсын Ерөнхийлөгчөөс өргөн барьсан хуулийн төслийн талаар АН-ын бүлэг ярилцаагүй. Бид нам дээрээ ярилцах ёстой. Үүний дараагаар албан ёсны байр сууриа илэрхийлнэ. Хэн нэгэн УИХ-ын даргатай холбоотой асуудал биш. 1990 онд Үндсэн хуулийг боловсруулж баталсан хүмүүс бүх зүйлийг харж хийсэн байгаа шүү дээ. Ялангуяа Б.Чимид гуай Үндсэн хуулийн дархлааг их анхаардаг. Өнөөдөр Үндэсний аюулгүй байдлын гурван гишүүн улс орны бодлогыг тодорхойлдог, үндэсний аюулгүй байдлын үзэл санааг гартаа барьж байдаг гурван гишүүний аль, аль нь дархлаатай байх ёстой. Ялангуяа УИХ-ын дарга дархлаатай байх ёстой. Тэгэхгүй бол засаглал тогтворгүй гэдэгтэй адил парламент ч гэсэн тогтворгүй байдал руу орох магадлалтай. Тиймээс би гишүүдийн олонхоор шийдээд явах нь зөв хувилбар гэж харахгүй байна.

-Энэ асуудалд танай нам хэзээ байр сууриа илэрхийлэх вэ?

-Бид улс төрийн процесс, эрх баригч хүчний байр суурийг харж байна. Одоохондоо яарахгүй байна.

-Орд газруудыг төрд авч байна. АН үүнд ямар байр суурьтай байна вэ?

-АН өчигдөр үзэл баримтлалын төслөө боловсруулж, Дээд шүүхэд албан ёсоор бүртгүүлсэн. Манай намын үзэл баримтлалын гол санаа нь барууны төвийн үзэл баримтлалтай байна. Тэр дундаа хувийн өмч зах зээлийн зарчмаар улс орны эдийн засаг хөгжих ёстой гэсэн байр суурьтай. Тиймээс бүх зүйлийг төрд авах замаар явах нь зөв биш. Үүний том жишээ Венесуэль Улс. Үндсэн хуулийн заалтаар иргэддээ үр ашигтай, хүртээмжтэй оногдох ёстой ногдлыг олгодог, өгдөг ийм байдлаар зохицуулалт хийх нь зүйтэй. Гэхдээ бүх юмыг хураавал Монголд гадаадын хөрөнгө оруулалт орж ирэх үү. Бид гадаадын хөрөнгө оруулалтыг татаж байж уул уурхай ашигт малтмалыг зөв зохицуулж явна. Сэтгэлийн хөөрлөөр, хэт улс төрийн хийрхлээр аливаад хандаж болохгүй.

-УИХ-ын чуулган хуралдалгүй сар гаруйн хугацаа өнгөрлөө. Хэрвээ чуулган хуралдвал прокуророос таван гишүүнийг оруулж ирж магадгүй гэсэн мэдээлэл бий. Ер нь УИХ хуралдахгүй байгаа нь зарим нэг гишүүн хэрэг завших гээд байгаа юм шиг харагдаж байна. Та энд байр сууриа илэрхийлэхгүй юу?

-Өнөөдөр хулгайг жижиг, том гэж хараад байна. Хулгай бол хулгай шүү дээ. Жижиг, томын ялгаа байхгүй. Энд тэрбум, тэрбумаар тэгш хуваарилсан зохион байгуулалттай төрийн хэмжээний луйвар. Ийм зохион байгуулалттай гэмт хэргийг “Зээл шүү дээ. Эргээд төлчихнө. Юун сүртэй юм бэ” гэж яриад байна. Нэгэнт хуультай, шүүхтэй улс орон юм бол том, жижигдээ биш. Харин хийсэн үйлдлийг нь шалгаж тогтоож, гэм буруутайд нь шийтгэл ногдуулахдаа учруулсан хохиролд таарсан шийтгэл ногдуулах хэрэгтэй. Энд хариуцлага тооцох ёстой. АН хатуу байр суурьтай байгаа.

-Д.Дорлигжавыг баривчиллаа. Түүнийг намын гишүүнчлэлээс хасах уу?

-Д.Дорлигжав даргын хувьд манай намын дарга байсан. Гэм буруутай нь тогтоогдвол намын дүрэмд зааснаар асуудлыг нь шийднэ. Заалтгүй бол хуулиараа асуудлаа шийдэх байх.

-Танай нам УИХ-ыг тараах тогтоолоо боловсруулсан уу?

-АН-ын Улс төрийн зөвлөл УИХ-ыг тараах шийдвэр гаргаад, УИХ дахь АН-ын бүлэг байр сууриа илэрхийлсэн. Бид удахгүй УИХ-ын ээлжит бус сонгуулийг явуулах тогтоолын төслийг боловсруулж, гарын үсэг цуглуулна. Өнөөдөр шударга ёс яриад байгаа хүмүүс тэр тогтоолд гарын үсэг зурах байх гэж бодож байна.