Монголын урчуудын эвлэлийн гишүүн, залуу зураач, гэр бүлийн авьяаслаг уран бүтээлч Т.Өлзийжаргал, А.Өлзийжавхлан нарын хамтарсан “ГЭР” уран зургийн үзэсгэлэн дэлгэгдэхэд бэлэн болжээ. Өөрийн гэсэн өнгө төрхөө олж, орон зайгаа тодорхойлж чадсан авьяаслаг уран бүтээлчдийн үзэсгэлэнд монгол гэрээс монгол оюунаар түүчээлсэн 50 гаруй бүтээлийг оюуны хүртээл болгохоор бэлтгэжээ. Үзэсгэлэн нь МУЭ-ийн үзэсгэлэнгийн танхимд 2018.12.26-нд нээлтээ хийх бөгөөд 2019.01.04-нийг дуустал дэлгэгдэнэ.
Т.Өлзийжаргал, А.Өлзийжавхлан нар нь Дүрслэх урлагийн Од сургуулийн уран зургийн ангийг 2004 онд төгссөнөөс хойш бодит зургийн суурьтай орчин үеийн чиг хандлагатай зургийг дагнан зурж байгаа бөгөөд ихэвчлэн монгол язгуурын дүр дүрслэлийг европ уран зургийн аргаар зурдгаараа уран зураг сонирхогчдод танигдсан юм.