Энэ сарын 17-нд Баян-Өлгий аймгийн Баяннуур сумын дунд сургуулийн дотуур байрны 71 хүүхдэд хоолны хордлогын шинж тэмдэг илэрч тусгаарлагдан эмчлүүлж байгаа талаар мэдээлсэн. Хөнгөн хордлого авсан хүүхдүүдийг нь дотуур байранд эмчийн хяналтад тусгаарласан бол хүндэвтэр хүүхдүүдийг эмнэлэгт хэвтэн эмчлүүлж байгаа юм. Баян-Өлгий аймгийн Эрүүл мэндийн газрын дарга Аягүлээр ахлуулсан баг халдварын голомтод ажиллаж байна. Эхний ээлжинд клиникийн шинж тэмдэг хурц илэрсэн 47 хүүхдийг эмнэлэгт хэвтүүлсэн. Үлдсэн 12 хүүхдийг дотуур байранд тусгаарлан, жижүүр эмчийн хяналтын дор эмчлүүлж байна. Хүндэрсэн хүүхдүүдийн биеийн байдал сайжирчээ. Өнөөдрөөс эмчлэгдсэн эхний хүүхдүүдийг эмнэлгээс гаргасан аж. Лабораторийн шинжилгээгээр хүүхдүүд ишрихаколи буюу хоолны хордлого үүсгэдэг гэдэсний халдварт өвчний нян илэрсэн. Үүнийг цааш нь ялган, ямар хэв шинж байгааг гаргахаар болжээ.