Монгол Улсын Их Хурлын Тамгын газрын Ерөнхий нарийн бичгийн Ц.Цолмон Бүгд Найрамдахчуудын Олон Улсын хүрээлэнгийн Суурин төлөөлөгч Крейг Кастаньяг өнөөдөр Төрийн ордонд хүлээн авч уулзлаа. УИХ-ын Тамгын газар, Бүгд Найрамдахчуудын Олон Улсын Хүрээлэн хамтран АНУ-ын Конгрессын Ардчиллын түншлэлийн дэмжлэгтэйгээр нийтийн сонсгол зохион байгуулах арга зүйн сургалтыг Улаанбаатар хотноо 2018 оны 12 дугаар сарын 13-14-ний өдрүүдэд, БНСУ-ын Үндэсний Ассамблейн үйл ажиллагаа, нийтийн сонсгол зохион байгуулж буй туршлагатай танилцах арга хэмжээг 12 дугаар сарын 17-18-ны өдрүүдэд БНСУ-ын Сөүл хотноо тус тус зохион байгуулахаар ажиллаж байна.

Уулзалтаар талууд энэхүү сургалт, туршлага судлах үйл ажиллагааны хөтөлбөр, төлөвлөгөө болон хамтын ажиллагааны бусад асуудлаар санал солилцож, сургалтыг чанартай, үр дүнтэй зохион байгуулахад онцгой анхаарч ажиллахаар тогтлоо.

Уулзалтад УИХ-ын Тамгын газрын Хууль, эрх зүйн хэлтсийн дарга Э.Түвшинжаргал болон албаны бусад хүмүүс байлцав.

Монгол Улсын Их Хурлын
Тамгын газрын Ерөнхий нарийн бичгийн дарга Б.Болдбаатар Бүгд
найрамдахчуудын олон улсын хүрээлэнгийн төлөөлөл болон Конгрессийн
төлөөлөгчдийн танхимын ардчилалын түншлэлийн хөтөлбөрийн төлөөллийг
өнөөдөр /2015.08.20/ хүлээн авч уулзав.

Улсын Их Хурлын Тамгын
газрын Ерөнхий нарийн бичгийн дарга Б.Болдбаатар төлөөлөгчдийг Монгол
Улсад тавтай зочлохыг уриад, парламентын үйл ажиллагааны талаар
танилцуулсан юм. Тэрээр Монгол Улсын Их Хурлын Тамгын газар ажилтнуудаа
чадавхжуулж, мэргэжлийн ур чадварыг нь дээшлүүлэх талаар онцгой анхаарч
байгааг тэмдэглээд, Тамгын газрын үйл ажиллагаанд дэлхийн тэргүүн
туршлагыг авч хэрэгжүүлэх, ялангуяа Конгрессийн туршлагыг нэвтрүүлэхийг
зорьж буйгаа илэрхийллээ. Түүнчлэн цаашдаа Бүгд найрамдахчуудын олон
улсын хүрээлэн болон Конгрессийн төлөөлөгчдийн танхимын ардчилалын
түншлэлийн хөтөлбөртэй хамтын ажиллагаагаа улам идэвхжүүлнэ гэдгийг
хэллээ. Мөн Монгол Улсын Их Хурлын Тамгын газар Нээлттэй сонсголын
танхимыг байгуулсаныг дурдаад, өнгөрсөн хаврын чуулганаар Нээлттэй
сонсголын тухай, Хууль тогтоомжийн тухай, Захиргааны тухай хуулиудыг
баталсан. Энэ хуулиуд нь хууль тогтоох дээд байгууллагын үйл ажиллагаанд
ихээхэн үүрэгтэй гэж үзэж байгаагаа илэрхийлээд, хуулиуд батлагдсанаар
Монгол Улсын парламент иргэд, сонгогчдынхоо өмнө ил тод, нээлттэй,
хяналттай байх юм гэлээ.

Төлөөлөгчид Улсын Их
Хурлын Тамгын газрын Ерөнхий нарийн бичгийн дарга Б.Болдбаатарыг цаг,
зав гарган хүлээн авч уулзсанд талархал илэрхийлээд, Тамгын газартай
хамтын ажиллагаагаа хэрхэн үргэлжлүүлэх талаар өөрсдийн саналаа хэлж,
сонирхсон асуултдаа хариулт авч, санал солилцсон юм хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.