УИХ-ын гишүүн Н.Номтойбаяр өчигдрийн хийсэн мэдээлэлд нэр дурдсан зургаан сайдын нэг нь Хөдөлмөр, нийгмийн хамгааллын сайд С.Чинзориг байсан. Тэгвэл уг асуудалд ХНХ-ын сайд С.Чинзориг тайлбар хийлээ. Тэрбээр “Засгийн газрыг огцруулах асуудалтай холбоотойгоор улс төрчид нэгнийгээ ор үндэсгүй гүтгэх байдал газар авлаа. Намайг “Бээвэр” гэдэг компаниараа дамжуулан 300 сая төгрөгийн зээл авсан гэх мэдээлэл цацагдаж байна. Би насаараа төрд алба хашиж байгаа хүн. Амьдралдаа нэг л удаа “Соёмбо консалтинг” гэдэг зөвлөх үйлчилгээний компани байгуулж байсан. Бусад гишүүдтэй адил олон компанигүй. Миний бие “Бээвэр” гэдэг компанитай ямар ч холбоогүй. Миний үр хүүхэд, ах дүүсийн дунд тийм компанитай хүн байхгүй. Миний сонгогдсон тойрог 12 сумтай. Би тойрогтоо нэг суманд 2-3 жижиг, дунд үйлдвэрийн төсөл бичиж өг гэдэг чиглэл өгсөн. Үүнийг би ХХААХҮ-ийн яаманд уламжилсан. Эдгээрээс 40 хувь нь л зээл авсан. Энэ нь нийтдээ 250 орчим сая төгрөгийн зээл юм билээ. Тийм учраас энэ асуудлыг гаргаж байгаа УИХ-ын гишүүдийг надаас болон манай тойргийн иргэдээс уучлал хүсэхийг шаардаж байна” гэв.