Саудын Арабын сэтгүүлч Жамаль Хашоггийн аллагын хэргийг мөрдөн шалгах үйл ажиллагаанд оролцохыг олон улсын мэргэжилтнүүдэд НҮБ-ын Хүний эрхийн асуудал эрхэлсэн дээд комиссар Мишель Бачелет уриалжээ. Уг мэдэгдэлд тэмдэглэснээр, дээрх хэргийг илрүүлэхэд Турк болон Саудын Арабын эрх баригчдын гаргаж буй хүчин чармайлтыг М.Бачелет өндрөөр үнэлсэн аж. Гэсэн хэдий ч энэ хэргийг мөрдөн шалгах ажиллагаанд олон улсын мэргэжилтнүүдийн оролцоо ихээхэн хувь нэмэр оруулахыг тэрбээр онцлон тэмдэглэсэн байна. Ж.Хашогги нь өнгөрсөн сард Туркийн нийслэл Истанбул хотод суугаа Саудын Арабын Консулын газарт амиа алдсан билээ.