Ерөнхий сайд асан Ч.Сайханбилэгийн гаргасан Оюутолгойтой холбоотой захирамжийг хууль бус гэж үзэн , шүүхэд хандсан талаар Дархан монгол нэгдлээс хэвлэлийн хурал хийлээ.
Энэ талаар Дархан Монгол нэгдлийн тэргүүн Д.Дашнямаас тодрууллаа.
-Ямар захирамжийг хууль бус гэж үзээд шүүхэд хандах гэж байгаа юм бэ?
-Тэрбум төгрөгөөр тоологдох америк долларын хэргийг захирамж гаргаад ганц хүний гарын үсгээр шийдсэн байна. Энэ нь хууль зөрчсөн үйлдэл юм. Дархан Монгол нэгдлээс Монгол Улсын ерөнхий сайдын 2015 оны нэгдүгээр сарын 23-ны өдрийн 27 дугаар захирамж, 2015 оны дөрөвдүгээр сарын 13-ны өдрийн 94 дүгээр захирамж, мөн оны дөрөвдүгээр сарын 16-ны өдрийн 99 дугаар захирамж, 2015 оны тавдугаар сарын 15-ны өдрийн 123-р захирамжуудыг тус тус илт хууль бус болохыг тогтоолгохоор Нийслэлийн захиргааны хэргийн анхан шатны шүүхэд хандаад нэхэмжлэл гаргаад байна.
-Гэрээ хийгээд таван жил боллоо. Хариуцах хүн нь хэн байх юм бэ. Одоогийн байдлаар эдгээр хүмүүс албан тушаалаа өгөөд явчихсан байгаа шүү дээ. Дархан Монгол нэгдлээс гаргаж байгаа гомдол та бүхний талд шийдэгдэх магадлал хэр байгааг судалж үзсэн үү?
-Ч.Сайханбилэгийн хувьд эх орноосоо урвасан үйлдэл хийсэн. Хоёр хүн хоорондоо яриад, тоглоом шиг зүйл дээр гарын үсэг зурж байгаа мэт гэрээ хийсэн. Энэ гэрээ нь 22 америк тэрбум доллар монгол төгрөгөөр бол хэдэн их наяд төгрөг шүү дээ. Ийм юмыг өөрийн дураар ганцаар шийдчихээд яваад өгсөн. Үүнийг улс орноосоо урвасан гэж шийтгэх хэрэгтэй.Түүнчлэн багт нь байсан тухайн үеийн Оюутолгойн ТУЗ-ийн дарга байсан Б.Бямбасайхан, Ганболд нарт хатуу хариуцлага тооцох хэрэгтэй.
Шүүхийн хувьд бид нэхэмжлэл гаргасан байгаа. Гэхдээ манай талд шийдэгдэнэ гэдэгт бид эргэлзэж байна. Ямар нэгэн шалтгаан олж гаргаад нэхэмжлэлийг маань хүлээж авахгүй, шүүх хурлын процессийг явуулахгүй байх магадлалтай.
-Шүүхэд хандахдаа ямар нэгэн тодорхой хүнийг өгөөгүй гэж ойлгож болох уу?
-Ч.Сайханбилэгийн гаргасан дөрвөн захирамжийг хүчингүй болгохын тулд шүүхэд өгсөн. Засгийн газраар хэлэлцээгүй, тогтоол гараагүй байхад өөрийн гарын үсгээ зурсан. Энэ бол хууль бус гэрээ юм. Үүнийг хүчингүй болгосноор “Дубайн гэрээ” гэсэн хууль бус гэрээг зогсоож чадна. Тэгвэл монголчуудад нүүрлээд буй асар их хэмжээний өр зээл болох 22 тэрбум төгрөгийн хохирлыг зогсоох болно.
-Дубайн гэрээний асуудлаар Ч.Сайханбилэг, Бямбасайхан нарыг АТГ шалгаж байгаа. Саяхан хорьж байгаад гаргасан. Та бүхний гаргаж байгаа гомдол үүнтэй ямар холбогдолтой юм бэ?
-Бид Ч.Сайханбилэгийн гаргасан захирамжийг хүчингүй болгохоор шүүхэд өгсөн. Харин Авилгатай тэмцэх газар захирамжийг хүчингүй болгохоор хориогүй. Бид захиргааны шүүхэд Сайханбилэгийн гаргасан дөрвөн захирамжийг хүчингүй болгох ёстой, хууль зөрчсөн байна гэж өгч байгаа. Энэ хэргийг Үндсэн хуулийн цэцэд өгч болохоор хэрэг. Үндсэн хуулийн цэцэд: Аливаа нэгэн том хэмжээний шийдвэрийг нийтийн зарчмаар шийдэх ёстой гэж заасан байдаг. Гэтэл энэ хүн ганцаараа шийдээд гарын үсэг зурсан байгаа. Энэ нь үндсэн хуулиа зөрчсөн хэрэг.
-Үндсэн хуулийн цэцэд хандсан уу?
-Одоогоор хандаагүй. Хуульчидтайгаа ярьж байгаад хандан гэж бодож байгаа.
-Гэрээтэй холбоотой тоо баримтуудаа хаанаас олдог вэ?
-УИХ-ын гишүүдтэй хамтарч ажилладаг учраас гишүүдээс авсан. Түүнчлэн хамтарч ажиллаж байгаа хуульч, сулаачидбүгд англи хэлтэй хүмүүс байгаа. Бид материалынэ эх үүсвэрээ “Рио Тинто”-гийн тайлангаас авдаг. Бид нарынгаргасан баримтууд бүгд үндэслэлтэй, баримттай байгаа. Эргээд үүнийхээ төлөө хариуцлага хүлээнэ.
-Ямар гишүүдээс мэдээллээ авсан юм бол?
-“Лоби” гэдэг 15 гишүүнтэй албан бус бүлэг байгаа. Эх орноо гэсэн сэтгэлтэй гишүүдтэйгээ хамтраад мэдээллээ солилцоод ажиллаж байна.Нэрийг нь тодорхой хэлмээргүй байна.
Б.ОЮУНЖАРГАЛ