Фэйсбүүк Мессенжэрээр бусдад бичсэн мессэжээ хүлээн авагчийг харахаас өмнө устгах боломжтой “Unsend” товчийг удахгүй бүх хэрэглэгчдэд хүргэхээр туршиж байгаа тухай эх сурвалжууд мэдээлжээ.
Шинэ боломж дараагийн хувилбартай цуг нэвтрэх магадлалтай байгаа гэнэ. Одоогоор тус мессенжэрт бичсэн мессэжээ устгах “delete” товч байдаг ч энэ нь зөвхөн бичсэн хүний цонхноос л устгадаг юм. Өөрөөр хэлбэл нэгэнт илгээсэн мессэжийг хүлээн авагчийн цонхноос арилгах, буцаах ямар ч боломжгүй. Анх өнгөрсөн дөрөвдүгээр сард Фэйсбүүкийн гүйцэтгэх захирал Марк Зукербэрг ийм нууц боломжийг ашигладаг болохыг нэг мэргэжилтэн илрүүлж байв. Бичсэн мессэжээ устгадаг функцийг Марк болон Фэйсбүүкийн дээд албан тушаалтнууд нууцаар хэдэн жилийн турш ашиглаж байсныг сүүлд зарим хэвлэлүүд олж тогтоожээ. 2014 онд Sony Pictures компани хакеруудад дотоод мэдээллээ алдаж, удирдлагуудын хоорондоо харилцаж байсан мессэжүүд ил болж байв. Энэ явдлаас сургамж авсан Фэйсбүүк компани илгээсэн мессэжээ устгах боломжийг зөвхөн захирлуудынхаа хүрээнд бий болгон ашиглаж эхэлсэн юм байна.
Тэгвэл энэ онцгой боломж удахгүй бүх хүний хэрэглээ болох гэж байгаа ажээ.