ОХУ-ын долоон тагнуулыг олон улсын цуврал цахим халдлагад оролцсон гэж АНУ-ын Хууль зүйн яам буруутгасан байна.
Тэднийг олон улсын химийн зэвсгийг хориглох байгууллага, Олон улсын Хөлбөмбөгийн холбоо болон АНУ-ын цөмийн эрчим хүчний компаниудын сүлжээнд халдахыг оролдсон гэж сэжиглэж байгаа ажээ. Сүүлийн үед ОХУ-ыг олон улсын хэмжээнд цахим халдлагууд хийж байна гэх шүүмжлэл олноор гарах болоод байгаа юм.
Хэдий тийм боловч ОХУ үүнийг үгүйсгэж “Барууныхны явуулга” гэж тайлбарлаж байгаа аж. Тухайлбал, Нидерландын холбогдох албанаас ОХУ-ын дөрвөн иргэнийг Химийн зэвсгийг хориглох байгууллагын сүлжээнд халдахыг завдсан гэж буруутгасан байна. Тус байгууллага Англид байхдаа хордсон ОХУ-ын тагнуулч асан Сергей Скрипалийн хэргийг шалгаж байсан юм. Үүнээс гадна Их Британийн Засгийн газар ОХУ-ын Тагнуулын агентлагийг олон улсын дөрвөн том цахим халдлагыг зохион байгуулсан гэж буруутгаад байна.