Энэ жил есдүгээр сарын 1-н бямба гаригт буюу амралтын өдөр тохиож байна. Гэсэн хэдий ч хичээлийн шинэ жилийн нээлт есдүгээр сарын 1-нд болно хэмээн салбарын сайд нь онцолсон. Тодруулбал, бямба гарагт хичээл орохгзй зөвхөн нээлт болох юм.
Энэ тухай БСШУС-ын сайд Ц.Цогзолмаа “Есдүгээр сарын 01-ний өглөө усархаг бороотой байна гэсэн цаг агаарын мэдээлэл ирсэн. Тиймээс хичээлийн шинэ жилийн нээлтийг есдүгээр сарын 1-ний 14.00 цаг болгож хойшлуулах шийдвэр гаргасан. Энэ шийдвэрийг сургуулийн удирдлагуудад хүргүүлсэн. Есдүгээр сарын 1-нд хичээл орохгүй хичээлийн шинэ жилийн нээлт буюу эрдмийн баяр болно.
Есдүгээр сарын 3-нд хичээлүүд цаг цагтаа орно. Харин их, дээд сургуулиудын хичээлийн цагт өөрчлөлт оруулж замын хөдөлгөөний нягтралыг бууруулъя гэж санал авч байна. Их, дээд сургуулиудын хичээлийг нэг цагийн дараа хичээллүүлэх санал гаргаад сургуулиудаас санал авч байна. Есдүгээр сарын 1-нээс өмнө шийдвэр гарвал олон нийтэд мэдэгдэнэ” гэсэн юм.