Засгийн газрын 2015 оны 368 дугаар тогтоолоор баталсан “Монгол Улсын шинжлэх ухаан, технологийг хөгжүүлэх тэргүүлэх чиглэл, цөм технологи”-ийг хэрэгжүүлэх зорилгоор дараах чиглэлээр төслийн гүйцэтгэгчийг сонгон шалгаруулна.
Цөм технологийн төсөлд тавигдах шаардлага:
- Цөм технологийн төслийн зорилго, гарах үр дүн нь стратегийн ач холбогдол бүхий инновацийн бүтээгдэхүүний үйлдвэрлэлийг бий болгох, салбар хоорондын хамаарлыг уялдуулан шинэ хэрэгцээ, хэрэглээг үүсгэх, өрсөлдөх чадварыг дээшлүүлэх зэрэгт дорвитой хувь нэмэр оруулж чадахуйц судалгаа туршилтын цогц үйл ажиллагаанд чиглэгдэнэ.
- Төсөл нь 2018 оноос эхлэн хэрэгжүүлэх цөм технологийн төслүүдийн зарлагдсан чиглэлд тавигдсан зорилтот үр дүнгийн шаардлагыг хангасан байна.
- Салбарын мэргэжлийн эрдэмтэд, судлаачид хамтран оролцсон байдал, судлаачдын технологийн боловсруулалт хийгдсэн ажил давамгайлсан зэргийг төслийн сонгон шалгаруулалтад харгалзана.
- Төслийн санхүүжилтээр худалдан авах багаж, тоног төхөөрөмжийн үнийн санал, техникийн үзүүлэлтийг баримтжуулан тусгана.
- Төсөл хэрэгжих хугацаа 2 хүртэл жил, цалингийн зардал төслийн санхүүжилтийн 30 хувиас хэтрэхгүй байна.
Сонгон шалгаруулалтад дэвшүүлэх төслийн саналыг 2018 оны 8 дугаар сарын 30-ны өдрийн 14:00 цагаас 2018 оны 9 дүгээр сарын 12-ны өдрийн 23:59 цаг хүртэл Боловсрол, соёл, шинжлэх ухаан, спортын яамны http://project.edu.mn/ хаягаар орж, цахимаар мэдүүлнэ.
Сонгон шалгаруулалтад оролцогч “Шинжлэх ухаан, технологийн төсөл хэрэгжүүлэх журам” болон тэргүүлэх чиглэл, цөм технологийн шалгуур үзүүлэлтийг баримтлан төслийг боловсруулна. /Журам, шалгуур үзүүлэлт www.mecss.gov.mn цахим хуудсанд тавигдсан болно/.
