Говь-Алтай аймгийн Хөхморьт сумын малчин түмэн адуун сүргээ өсгөн өнгөрсөн оны жилийн эцсийн мал тооллогоор 11.17 мянгад хүргэснээс гадна тус сумаас анх удаа Монгол Улсын Алдарт уяач цолыг нутгийн унаган хүү Т.Ганзориг хүртсэн юм. Тиймээс Хөхморьт нутгийн зон олон эдгээр баяраа хамтатган наймдугаар сарын 8-11-ний өдрүүдэд “Түмэн адууны баяр”, Монгол Улсын Алдарт уяач Т.Ганзоригийн цолны мялаалга наадмаа өргөн дэлгэр хийлээ.
Уг баяр наадмыг Хөхморьт мусын ИТХ, ЗДТГ, Улаанбаатар хот дахь нутгийн зөвлөл, “Морьт Галуут” уяачдын гал хамтран зохион байгуулсан бөгөөд наадамд нутгийн уугуул, суугуул иргэд, үр хүүхдүүд, хүргэн бэрүүдийг болон сумд ажиллаж, амьдарч байсан нийт хүмүүс, түүнчилэн Улаанбаатар хот болон Монгол орны өнцөг булан бүрт аж төрөн суугаа иргэд идэвх санаачилгатай оролцлоо.
Наадмаар Их нас, Азарга, Соёолон, Шүдлэн, Хязаалан, Жороо, Дааган насны морьдын уралдаан, сур, шагайн харваа, хүчит 32 бөх эр бяраа сорин наадамчин олныг баясгасан юм. Мөн үеэр адууны хэрэгсэл, тоног төхөөрөмжийн үзэсгэлэн худалдаа, “Сайхан хос морьтон” шалгаруулах тэмцээн зохион байгуулсан нь ба энэ наадмаар эрлийз морьдыг уралдуулаагүй байна.