Засгийн газрын өнөөдрийн ээлжит хуралдаанаар “Тавантолгой-Гашуунсухайт чиглэлийн төмөр замын төслийг эрчимжүүлэх” асуудлыг хэлэлцэн баталсан байна. Энэ талаар ЗТХ-ийн сайд Ж.Бат-Эрдэнэ мэдээлэл хийв.
Уг төслийг хэрэгжүүлэх зорилгоор “Монголын төмөр зам” компани 279 сая ам.доллар зарцуулаад буй юм. Уг хөрөнгө дууссаны дараа буюу 2015 онд санхүүгийн хүндрэлийн улмаас төслийн үйл ажиллагаа зогсоод буй юм. Засгийн газрын энэ оны долдугаар сарын 09-ны хуралдаанаар төрийн өмчийн 51, гадны 49 хувийн санхүүжилттэй “Тавантолгой төмөр зам” компани байгуулах шийдвэр гаргасан. “Тавантолгой-Гашуунсухайт чиглэлийн төмөр замын төсөл”-ийг хэрэгжүүлэхэд шаардлагатай хөрөнгийг дээрх компаниар дамжуулан босгохоор төлөвлөснийг Зам тээврийн сайд дурьдлаа. Мөн “Тавантолгой төмөр зам” компанийн Монголын талын 51 хувийн 17-34 хувьд “Эрдэнэс Тавантолгой” компани хөрөнгө оруулахаар төлөвлөснийг дурьдсан юм.
Тэрбээр мэдээллийнхээ дараа сэтгүүлчдийн асуултад хариулав.
-“Тавантолгой-Гашуунсухайт чиглэлийн төмөр замын төсөл”-д хэдэн төгрөгийн санхүүжилт шаардлагатай вэ?
-Одоогоор “Монголын төмөр зам” компани 279 сая ам.доллар зарцуулсан. Төмөр замын төслийг эрчимжүүлэх ажлын хүрээнд эхний ээлжинд 100-200 сая ам.долларын хөрөнгө оруулалт хийхээр төлөвлөж байгаа.
-“Эрдэнэс Тавантолгой” компанийн 30 хувьд IPO гаргах ажил ямар шатандаа явж байна вэ?
-Бэлтгэл ажил хэвийн үргэлжилж байгаа. “Эрдэнэс Тавантолгой” компани “Тавантолгой төмөр зам” компанид хөрөнгө оруулалт хийснээр IPO-ийн үнэлгээ өсөх боломжтой.