Энэ сарын 27-ноос 29-ний өдөр Архангай аймгийн Өгийнуур суманд Олимпийн хөтөлбөр дэх сонирхолтой, үзүүштэй төрлийн нэг-триатлоны Улсын аварга шалгаруулах тэмцээн болсон. Тус тэмцээний элит, өсвөр үе, мини, сонирхогчид, багийн буухиа ангилалд оролцсон нийт 220 тамирчны дунд олны танил эрхмүүд байсан нь үзэгчдийн сонирхлыг ихэд татсан ажээ.
Тодруулбал, тамирчдын дунд Монгол Улсын Ерөнхийлөгч асан Н.Энхбаяр, Сангийн дэд сайд Х.Булгантуяа охины хамт, “Ард” санхүүгийн нэгдлийн Гүйцэтгэх захирал Ч.Ганхуяг хөвгүүдийн хамт, цанын спортын ОУХМ Г.Ганбаатар болон бусад нэр хүндтэй хүмүүс багтсан байна.
“Ironman” клубын тамирчин Н.Энхбаярын хувьд тэмцээний сонирхогчдын ангилалд оролцож, зайгаа амжилттай дуусгасны медаль хүртсэн аж. Тус тэмцээн бороо, салхи, хурц нартай байгаль цаг уурын янз бүрийн нөхцөлд болж, тамирчдын тэсвэр хатуужлыг сорьсон байна.
