Нийслэлийн Зоонозын өвчин судлалын төвөөс Төв аймгийн Баяндэлгэр, Баянжаргалан сум, Нийслэлийн Багануур дүүргийн нутаг дэвсгэрт орших нуурууд, Хэрлэн голын ай сав, Бүс нуур, Улаанбаатар хотын Төв цэвэрлэх байгууламж, Туул голын ай савын дагуу ус, намгийн шувуудын нүүдэллэн өнгөрөх, өндөглөх хугацаатай давхцуулан ажиглалт тооллогыг хийж гүйцэтгэжээ.
Тооллогоор шувуудын тоо өмнөх оны мөн үеийнхээс 10 хувиар нэмэгдсэн байна. Нийтдээ 8 багийн, 12 овгийн, 21 төрлийн, 25 зүйлийн 3982 шувууд тоологджээ. Шувуудын зүйлийн бүрдлийн хувьд өмнөх оныхоос 3 баг, 6 зүйлээр илүү байв.
Судалгаанд хамрагдсан ус, намгийн шувуудаас галуутны (79.83%) багийн шувуу, үүний дотроос нугасны (33%) төрөл зонхилж байна. Ажиглалт тооллого хийх явцад шувууны томуугийн болон ямар нэгэн шалтгааны улмаас гэмтсэн болон үхсэн шувуу тааралдсангүй аж.