БЗД-ийн 79-р сургуулийн хөлбөмбөгийн талбайн хаалга унаж тэнд тоглож байсан хүү амиа алдсан хэрэг өчигдөр буюу энэ сарын 18-ны өдөр гарсан. Хүү тус сургуулийн тавдугаар ангийн сурагч байсан аж.
Хэргийн талаар ЦЕГ-ын хэвлэл мэдээллийн төвийн дарга Б.Баатархүүгээс тодруулахад “Уг хэргийн дуудлага өчигдөр 19:20 минутад Баянзүрх дүүргийн цагдаагийн хэлтэст ирсэн. 11 настай эрэгтэй хүүхэд осолдсон. Хэргийг Баянзүрх дүүргийн цагдаагийн гуравдугаар хэлтэст шалгаж байна. Одоогоор хяналт, шалгалт хийгдэж байгаа учраас амиа алдсан шалтгаан нь тогтоогдоогүй байна” гэв.
Харин 79-р дүгээр сургуулийн захирал Ш.Болор-Эрдэнэ “Өчигдөр орой 19:00 цагийн үед хөлбөмбөгийн талбайд хүүхэд амиа алдсан харамсалтай зүйл боллоо. Хөлбөмбөгийн хаалганы нэг шон нь алга болчихсон байсан. Цагдаагийн байгууллага шалтгааныг тогтоохоор шалгаж байна” гэлээ.