УИХ хуралдаж, гишүүнд эрүүгийн хэрэг үүсгэж яллагдагчаар татсантай холбогдуулан бүрэн эрхийг нь түдгэлзүүлэх тухай Монгол Улсын Ерөнхий прокурорын саналыг хэлэлцлээ.
Байнгын хорооны хуралдааны үеэр хэрэгт шалгагдаж байгаа хоёр гишүүн өөрийгөө өмгөөлсөн үг хэллээ. Д. Гантулга гишүүн “Д.Гантулга гэдэг хүнийг заналхийлэх, нэр хүндийг нь гутаан дормжлох үйл явц үргэлжилсээр ирлээ. Шүүх шинжилгээний байгууллагын дүгнэлт л гэхэд 2-3 удаа гарч, эргэж буцлаа. Би энэ асуудлаар хууль хяналтын байгууллагад дахин хандаж, үнэн мөнөө тогтоолгоно” гэсэн. Харин Д.Мурат гишүүн “Би хэрэг хийсэн гэж үзэхгүй байна. Нотлох баримт байхгүй. Хэлмэгдэж байгаа” гэж хэлсэн юм.
УИХ-ын гишүүний бүрэн эрхийг түдгэлзүүлэх эсэх асуудлаар нууц санал хураалт явуулсан. Санал хураалтад нийт 57 гишүүн оролцож, УИХ-ын гишүүн Д.Муратын бүрэн эрхийг түдгэлзүүлэх эсэхийг хуралдаанд оролцсон гишүүдийн олонх буюу 33 гишүүн ( 57,9 хувь) УИХ-ын гишүүн Д.Муратын бүрэн эрхийг түдгэлзүүлэх шаардлагагүй гэж үзсэн.
УИХ үргэлжлүүлэн Д.Гантулга гишүүний бүрэн эрхийг түдгэлзүүлэх эсэхийг хэлэлцэж, нууцаар санал хураахад хуралдаанд оролцсон 57 гишүүний 28 нь буюу 49,1 хувь нь түдгэлзүүлэх саналыг дэмжлээ. Ийнхүү хуралдаанд оролцсон УИХ-ын гишүүдийн олонхи нь Д.Гантулга гишүүний бүрэн эрхийг түдгэлзүүлэх шаардлагагүй гэж үзлээ.