Эх хүүхдийн эрүүл мэндийн үндэсний төвийн гаднах тохижилтын ажил энэ сарын долоонд эхлэх юм байна. Энэхүү ажил нь нийслэлийн төсвөөр 2018 онд хэрэгжүүлэх томоохон ажлуудын нэг юм. Үүнд авто зам, авто зогсоол, нисдэг тэрэг буух зогсоол барихаар төлөвлөжээ.
Зам барилгын ажил эхлэхтэй холбогдуулан Эх нялхас /хуучнаар/ руу орж гарах гарц, замыг ээлжлэн хаана. Наадмын өмнө ажлаа дуусган хүлээлгэж өгөх аж. Нийслэлийн Авто замын хөгжлийн газрын захиалгаар тус ажлыг “Энигма Констракш” ХХК гүйцэтгэх юм.
Түүнчлэн Баянзүрх дүүрэг Халдварт өвчин судлалын үндэсний төвийн гадна талбайд хийх авто зам, авто зогсоол, нисдэг тэрэг буух талбай барих ажил эхлээд байна. Нийслэлийн Төсвийн хөрөнгө оруулалтаар хийж байгаа энэ ажил ирэх наймдугаар сард дуусна. Улмаар “Өргөө” амаржих газрын гадна талбайн тохижилтын ажлыг эхлүүлэхээр бэлтгэл ажил хангагдаад байгааг албаныхан тодотгов.