Дэлхийн эрүүл хотуудын сүлжээ болох “Эрүүл хотуудын түншлэл” санаачлагын хүрээнд Нийслэлийн Засаг даргын ЗДТГ, Замын цагдаагийн алба, Нийслэлийн Эрүүл мэндийн газар хамтран “Хамгаалах бүс, хамгаалах малгайн хэрэглээг хэвшүүлснээр замын хөдөлгөөний аюулгүй байдлыг хангах” төслийг хэрэгжүүлж, өнөөдөр төслийн нээлтийг зарлаж байна.

Энэхүү төсөл нь 18 сарын хугацаанд хэрэгжих бөгөөд уг төслийн эхлэл болгож Улаанбаатар хот болон хот орчмын замд зорчиж буй тээврийн хэрэгслийн жолооч, зорчигч нарын дунд хамгаалах бүсний хэрэглээний түвшинг тодорхойлох судалгааг 5000 гаруй жолоочоос авч явууллаа.

Уг судалгааг нийслэлийн 6 дүүрэгт тодорхой байршлуудад, мөн хот орчмын замд буюу 22-ын товчоо, Баянзүрхийн товчоо, хйод чиглэлийн зуслангийн замд, Өлзийт хорооллын замд нийт цагдаагийн 10 албан хаагч, Хууль сахиулахын их сургуулийн 62 сонсогчийн хамт ажлын 2 өдөр, амралтын 1 өдрийн турш явуулсан юм.

Судалгааны урьдчилсан дүнгээс танилцуулахад:

Жолооч хамгаалах бүс хэрэглэсэн- эрэгтэй-94 хувь, эмэгтэй 93 хувь буюу нийт 93,8 хувь нь хэрэглэсэн,
Урд суудалд сууж яваа зорчигч хамгаалах бүс бүсэлсэн- эрэгтэй 73 хувь, эмэгтэй 73 хувь буюу нийт 73 хувь нь хэрэглэсэн,
Арын 1 зорчигч хамгаалах бүс бүсэлсэн-18 хувь хэрэглэсэн, 82 хувь хэрэглээгүй,
Арын 2 зорчигч хамгаалах бүс хэрэглэсэн-12,9 хувь хэрэглэсэн, 87,1 хувь хэрэглээгүй,
Арын 3 зорчигч хамгаалах бүс хэрэглэсэн-14,6 хувь хэрэглэсэн, 85,4 хувь хэрэглээгүй,
Арын суудлын бүрээс хамгаалах бүс хийх нүхтэй эсэх судалгаанд 79,9 хувь нь тийм гэсэн хариултыг өгсөн байна.

Дээрх судалгаанаас үзэхэд жолооч нар хамгаалах бүс хэрэглэж хэвшсэн хэдий ч тээврийн хэрэгслээр зорчигч нарт хамгаалах бүс хэрэглэхийг шаарддаггүй, хэрэглүүлдэггүй зөрчил гарч байна.

Төслийн хүрээнд хамгаалах бүсний ач холбогдлыг иргэдэд сурталчлан таниулж, мэдээлэл сурталчилгааг бүх хэлбэрээр олон нийтэд хүргэх кампанит ажлыг зохион байгуулах бөгөөд үүний дараа дахин хамгаалах бүсний хэрэглээний түвшин тогтоох судалгааг явуулж, үр дүнг тооцох юм байна.

Нийслэлийн Засаг дарга бөгөөд Улаанбаатар хотын Захирагч С.Батболд “Хамгаалах бүс, хамгаалах малгайн хэрэглээг хэвшүүлснээр зам, тээврийн аюулгүй байдлыг сайжруулах” төслийг хэрэгжүүлж эхэллээ. Энэ төсөл нь нийслэл Улаанбаатар хотын ард иргэдийг халдварт бус өвчин, осол гэмтлийг бууруулах чиглэлээр авч хэрэгжүүлж байгаа чухал санаачлага болж байна.

Төслийн нээлтийн танилцуулгын талаар Нийслэлийн ЗДТГ-ын Хэвлэл мэдээлэл, олон нийттэй харилцах хэлтсийн дарга Э.Дагиймаа, Нийгмийн бодлогын хэлтсийн хэлтсийн дарга М.Эрдэнэжаргал, Нийслэлийн Эрүүл мэндийн газрын Нийгмийн эрүүл мэндийн хэлтсийн дарга О.Энхзаяа, Замын цагдаагийн албаны Урьдчилан сэргийлэх хэлтсийн ахлах мэргэжилтэн, цагдаагийн хошууч Б.Лхагважаргал болон “Замын аюулгүй байдлын төв” ТББ-ын тэргүүн О.Батжаргал нар мэдээлэл өглөө.

Замын цагдаагийн албаны Урьдчилан сэргийлэх хэлтсийн ахлах мэргэжилтэн, цагдаагийн хошуучБ.Лхагважаргал “2017 оны байдлаар зам тээврийн осолд өртөгсдийн 76 хувь нь хамгаалах бүс хэрэглэсэн, дөрвөн хувь хэрэглэсэн эсэх тодорхойгүй амь насаа алдсан, 20 хувь суудлын бүс хэрэглээгүй байсан. Зам тээврийн осолд өртсөн хүүхдүүдийн хувьд өнгөрсөн онд 55 хүүхэд осолд өртөж амь насаа алдсан. Үүнээс 47 хүүхэд суудлын бүс хэрэглээгүй буюу эцэг эхтэйгээ авто машинд зорчиж яваад орон нутгийн замд амиа алдсан байна” гэлээ.

Төсөл хэрэгжиж эхлэхтэй холбоотой иргэдийн дунд хийсэн судалгаагаар зам тээврийн хөдөлгөөнд оролцож байгаа жолооч болон зорчигчид 93.8 хувь бүсээ бүсэлдэг байна. Урд суудалд зорчигчид 73 хувь бүсэлдэг бол тээврийн хэрэгслийн арын суудалд суудаг зорчигчид 82-87 хувь нь бүс бүсэлдэггүй гэж судалгаа гарчээ.

Авто машин 100км/цаг хурдтай явж байгаа нөхцөлд зорчигч хамгаалалтын бүсээ зүүсэн бол амь нас бүрэн аврагдах боломжтой. Манай улсад орон нутгийн замд 80 км/цаг хурдтай явахыг зөвшөөрдөг. Тиймээс иргэд замын хөдөлгөөнд оролцохдоо хамгаалалтын бүсийг хэрэглэж хэвшүүлэх нь энэхүү төслийн гол зорилго юм.

Төсөл 18 сарын хугацаанд хэрэгжиж энэ хүрээнд Улаанбаатар хот болон хот орчмын замд зорчиж буй тээврийн хэрэгслийн жолооч, зорчигч нарын дунд хамгаалах бүсний хэрэглээний түвшинг тодорхойлох судалгаа, хамгаалан бүсний ач холбогдлыг иргэд олон нийтэд сурталчлах, мэдээлэл сурталчилгааг олон нийтэд хүргэнэ. Төслийн албан ёсны нээлт зургаадугаар сарын 6-ны өдөр болох юм.