Украины зүүн-өмнөд хэсэг дэх нөхцөл байдал болон Крымыг Орост нэгтгэсэнтэй холбоотойгоор ОХУ-ын эсрэг авч хэрэгжүүлж буй хориг арга хэмжээ Оросын эрх баригчид “Оросын цэргийг” Донбассаас гаргах хийгээд Крымын хойгийг Украины хяналтад эргүүлэн өгөх хүртэл үргэлжилнэ гэж НҮБ-д суугаа АНУ-ын байнгын төлөөлөгч Никки Хейли мягмар гарагт НҮБ-ын Аюулгүйн Зөвлөлийн энэ жил Украины асуудлаар хийсэн анхны хуралдаан дээр мэдэгдсэн тухай РИА Новости агентлаг мэдээлэв.
Өөрсдийгөө зарлан тунхаглаад байгаа бүгд найрамдах улсуудын /Донецк, Луганск/ зэвсэгт отрядууд Оросын цэргийнхэнд захирагддаг төдийгүй тэдэнтэй хамтран тулалдаж байгаа гэсэн АНУ-ын засаг захиргааны байр суурийг Н.Хейли давтан илэрхийлсэн байна.
Донбассын мөргөлдөөнийг зохицуулах үндэс нь Минскийн тохиролцоо боловч түүнийг сөргөлдөгч талууд хэрэгжүүлэхгүй байгаа юм. ОХУ нь мөргөлдөөнд оролцогч тал биш гэж тус улсын эрх баригчид удаа дараа мэдэгдэж байгаа билээ.