“Улаанбаатар марафон -2018” олон улсын гүйлтийн тэмцээн өнгөрсөн бямба гарагт болж Баянзүрх дүүргийн иргэд, аж ахуй нэгж байгууллагуудидэвх санаачлагатай оролцлоо. Гүйлтийн спортыг хөгжүүлэх, гүйлтээр хичээллэгч, сонирхогч иргэдийн тоог нэмэгдүүлэх, өсвөр, залуу үеийнхэнд өөрийн дотоод нөөц боломжийг нээж, тэсвэр хатуужил, бие бялдрын болон оюун санааны өв тэгш хүмүүжлийг төлөвшүүлэх, иргэдийн өдөр тутмын биеийн тамираар хичээллэх идэвх санаачлагыг дэмжих зорилготой уг арга хэмжээг жил бүр уламжлал болгон зохион байгуулдаг билээ.
‘’Улаанбаатар марафон-2018’’ тэмцээнд дүүргийн хэмжээнд нийт 6100 гаруй иргэн бүртгүүлж, оролцсон бөгөөд тэмцээнд оролцсон тамирчдад амжилт хүсэн дүүргийн Засаг даргын Тамгын газраас Монгол бөхийн өргөөний өмнө талбайд “Марафонд нэгдсэн – Баянзүрх” арга хэмжээг зохион байгуулсан юм. Энэхүү арга хэмжээд дүүргийн Хөдөлмөр эрхлэлт, нийгмийн хөгжлийн асуудал хариуцсан Засаг даргын орлогч Б. Наранчулуун, Нийгмийн хөгжлийн хэлтсийн дарга С.Сувд-Эрдэнэ болон дүүргийн ЗДТГ-ын дотоод хэлтэс, албадын албан хаагчид, иргэд, хүүхэд багачууд оролцлоо.
Мөн энэ үеэр дүүргийн Соёлын ордны бяцхан авьяастнууд, Засаг даргын дэргэдэх өсвөрийн шигшээ багийн тамирчид үзүүлэх тоглолт хийж марафонд оролцож буй тамирчдад амжилт хүссэн юм хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.