Нийгэмд эерэг өөрчлөлт авчирах зорилготой “Залуу Манлайлал Хөтөлбөр 2018”-ын “Номын Өргөө” буюу Book House төсөл амжилттай хэрэгжиж байна. Төслийн хүрээнд бага дунд сургуулиас сонгон шалгаруулалт хийн, сонгогдсон сургуульд дотоод тохижилтыг чанарын өндөр түвшинд гүйцэтгэж хүүхдэд ээлтэй, байнгын сургалт, хэлэлцүүлэг хийх орчинг бүрдүүлэхээр ажиллаж байна. Төслийн багийнхан номын өргөөний дотоод заслыг үндэсний уламжлалт гэрийн дотоод засал, орчин үеийн интерьертэй хослуулан хийж байгаагаараа шинэлэг болсон юм. Зөвхөн дотоод тохижуулалт хийгээд зогсохгүй сар бүр номын хэлэлцүүлэг, сургалт явуулах бөгөөд цаашид үүнийг тогтмол болгох зорилготойгоор төслийн хамт олон ажиллаж байгаагаа хэлж байна.
2003 оноос хойш өнөөдрийг хүртэл 270 гаруй манлайлагч залуусыг 8 сарын манлайллын хөтөлбөрт хамруулж, олон төсөл хөтөлбөрийг амжилттай хэрэгжүүлсэн “Залуу Манлайлал Хөтөлбөр”-ийнхөн цөөн хүн ч гэсэн нийгэмд эерэг өөрчлөлтийг авчирах чадалтай байдгийг харуулах, бусдыг уриалах зорилготой, аливаа асуудлыг дээрээс нь биш, хүмүүсийн өөрсдийнх нь оролцоотойгоор, дэргэдээс нь шийдвэрлэхийг хичээдгээрээ онцлогтой билээ. Энэ жилийн “Номын өргөө” төслийн багийнхан ЕБС-ийн сургуулиудад нээлттэй сонгон шалгаруулалт хийн Баянзүрх дүүргийн 21-р хороонд байрлах ерөнхий боловсролын 127 дугаар сургуулийг сонгосон.
.jpg)
Энэ хичээлийн жилд 1064 сурагчтай болон үйл ажиллагаагаа өргөжүүлэн хичээллэж байна. Тус сургуулийн сурагчид номын сандаа ном унших ширээ, сандал номын сангийн фонд баяжилт байхгүй ба номын сан 90м квадрат талбайтай. 127-р сургуулийн эцэг эхчүүдэд төслөө танилцуулан номын сангийн засварын ажлыг эхэлсэн. Уг төсөлд “Нобелийн шагналтнууд ТББ” төсөл хэрхэн амжилттай хэрэгжүүлэх тал дээр тусалж дэмжин ажилласан байна. Төслийн хүрээнд хөрөнгө босгох үйл ажиллагааг амралтын өдрөөр сонирхолтой мэдлэг, мэдээллийг залууст хүргэхээр ажиллаж, үүнд Монголын Оюун Ухааны Академийн ерөнхий дасгалжуулагч, Олон улсын шүүгч Б.Баасандорж, Эрдэмт ТББ-г үүсгэн байгуулагч, Жак Ма-гийн Алибаба номын орчуулагч Э.Саруул, Австри улсын Vienna хотын технологийн их сургуульд монгол улсын засгийн газрын тэтгэлгээр архитектурын чиглэлээр мастерийн зэргээ хамгаалж буй Б.Булган нар оролцоод байна. Ном хандивлах уриалга явуулж байгаа бөгөөд үүнд Pizza Hut, Хаан банк, Ариг банкны хамт олон мөн нийгэмдээ зөв үлгэр дууриалал үзүүлэх сэтгэлтэй залуус маань ном хандивлан дэмжиж байна.
Дашрамд дурдахад, дотоод зураг төсөл дээр дизайнер Б.Цэрэнчимэд маань ажиллаж, үүнийг бодит биет зүйл болгох тал дээр Номын өргөө төслийн хамт олон хамтран ажиллах байгууллага хайж байна. Номын санг тохижуулах мөн ном хандивлах хүсэлтэй иргэн, албан байгууллага бүрт “Номын өргөө” төслийн багтай хамтран ажиллах боломж нээлттэй юм байна.