Азийн Хөлбөмбөгийн Холбооны Нийгмийн хариуцлагын хэлтсээс санаачлан, Монголын Хөлбөмбөгийн Холбоо, “Их Талын Дуулиан” ТББ-тэй хамтран хэрэгжүүлж буй “Хөлбөмбөгөөр дамжуулан эмэгтэйчүүдийг хүчирхэгжүүлэх нь” сэдэвт зөвлөгөөн боллоо.
Уг зөвлөгөөнд оролцохоор АХБХ-ны Нийгмийн хариуцлагын хэлтсийн дарга Аннатурай Ранганатан хүрэлцэн иржээ. МХБХ-ны ЕНБД Ө.Шижир нээлтийн үйл ажиллагаанд оролцов. Нийслэлийн есөн дүүргийн бага сургуулийн биеийн тамирын багш нарын дунд болсон зөвлөгөөнөөр өсвөр үеийн тамирчид тэр дундаа эмэгтэй тамирчдад тохиолддог асуудлууд, ололт амжилт, сэтгэл зүй, саад бэрхшээл, тэдгээрийг даван туулах гэх мэт олон зүйлсийг ярилцан, гарах гарцын талаар мэдээлэл хүргэсэн юм.
МХБХ-ны Ерөнхийлөгч А.Ганбаатар, Аннатурай Ранганатаныг хүлээн авч уулзахдаа: “Нийгмийн хариуцлагын чиглэлээр 3-4 жил хамтарч ажиллах хүсэлтэй байгаагаа хэлсэн. Тэгэхдээ анхны тусламж, тоглолт наймаалцах, допин хэрэглэхийн эсрэг сэрэмжлүүлэг ажил хийх, Паралимпд оролцох хөлбөмбөгийн баг байгуулж, дасгалжуулагчийг нь сургах” зэргийг дурдав. Мөн “Хөлбөмбөгөөр дамжуулж эмэгтэйчүүдийг хүчирхэгжүүлэх нь” сэдэвт нийгмийн хариуцлагын ажил МХБХ-ны талбайд хүүхдийн “Грассрүүтс” хөтөлбөрөөр үргэлжлэнэ.
“Хөлбөмбөгөөр дамжуулж эмэгтэйчүүдийг хүчирхэгжүүлэх нь” зөвлөгөөнд тавигдсан илтгэлүүд:
1. АХБХ-ны Нийгмийн Хариуцлагын Хэлтсийн дарга Аннатурай Ранганатан – AFC Social Responsibility Unit
2. МХБХ-ны Гадаад харилцааны мэргэжилтэн Б.Болор – Хүүхэд, Эмэгтэйчүүдэд чиглэсэн Хөлбөмбөг
3. ОУОХ-ны Спорт, эмэгтэйчүүдийн комиссын гишүүн П.Тунгалаг – ОУОХ-ны Бодлого
4. Хүйсийн тэгш эрх төв ТББ-аас Г.Ганбаясгах – Спорт дахь бэлгийн хүчирхийлэл
5. Монголын 16, 19 хүртэлх насны охидын шигшээ багийн ахлах дасгалжуулагч Ики Ёожи – Мөрөөдөл рүүгээ тэмүүлээд… Go Go !!!
6. Сэтгэл зүйч Ц.Дэлгэрмэнд – Эмэгтэйчүүд спортоор яагаад хичээллэдэг вэ?
7. МУЗН-ийн Сургагч багш, Хүний их эмч Н.Түвшинбаяр – Спортын гэмтлийн үед үзүүлэх анхны тусламж