Хүүхдийг зам тээврийн осол, хэргээс урьдчилан сэргийлэхэд замын хөдөлгөөнд аюулгүй оролцох мэдлэг, дадал, чадвар эзэмшүүлэх, сургалтын орчинг боловсронгуй болгох зайлшгүй шаардлагатай юм. Иймд улсын хэмжээнд явагдаж буй “Бяцхан зорчигч” аяны хүрээнд Замын цагдаагийн алба, “Аригу медиа” ХХК-ны санаачилгаар Тоёота ХХК-ны санхүүжилтээр явагдсан “Хүүхэд ба замын аюулгүй хөдөлгөөн” төслийн нээлтийн арга хэмжээ өнөөдөр боллоо.
Уг төслийн хүрээнд бага насны хүүхдийн нас, сэтгэхүйн онцлогт тохирсон “Замын хөдөлгөөний орноор” цуврал номыг бүтээж, замын зорчих хэсэгтэй ойр байрлах, эрсдэлтэйд тооцогдох Сонгинохайрхан дүүргийн ерөнхий боловсролын 67 дугаар сургуулийг сонгон Замын хөдөлгөөний аюулгүй байдлын талаар анхан шатны мэдлэг олгох сургалтын материаллаг бааз, Мини дромоор хангаж бодит сургалтыг зохион байгуулж байгаа билээ.
Нээлтийн үйл ажиллагаанд Нийслэлийн Засаг даргын Нийгмийн хөгжлийн асуудал хариуцсан орлогч Ш.Анхмаа, Тоёота Сэйлс Монголиа ХХК-ны гүйцэтгэх захирал Тоширо Курахаши, Аригу медиа ХХК-ийн захирал Б.Ариунбат, ЗЦА-ны УСХ-ийн ахлах мэргэжилтэн, цагдаагийн хошууч Г.Насанжаргал болон 67-р сургуулийн захирал Б.Чойдорж нар оролцсон бөгөөд арга хэмжээний үеэр тус сургуулийн 1-5 дугаар ангийн 1600 гаруй сурагч хүүхдүүдэд “Замын хөдөлгөөний орноор” цуврал номыг гардуулан өгч, замын цагдаа, багш нар хамтран 40 минутын сургалтыг зохион байгуулав.