Умард Солонгосын удирдагч Ким Жөн Ун, АНУ-ын Ерөнхийлөгч Дональд Трамп нарын уулзалт болох магадлалтай гэгдэж буй газруудаас Монгол болон Сингапур тунаж үлдээж байгаа тухай мэдээлэл саяхан гарсан билээ. Тэгвэл Сингапурын Ерөнхий сайд Ли Сяньлун өнөөдөр Зүүн Өмнөд Азийн Улсуудын Холбоо буюу АСЕАН-ы дээд хэмжээний уулзалтын үеэр сэтгүүлчдийн асуултад хариулахдаа “Бид ч мөн АНУ-Умард Солонгосын уулзалт болох магадлалтай гэгдэж буй газруудын талаарх мэдээллийг та бүхний нэгэн адил хэвлэл мэдээллийн хэрэгслүүдээс олж харсан. Бидэнд холбогдох талуудын аль нь ч энэ уулзалтыг Сингапурт зохион байгуулах асуудлаар албан ёсны хүсэлт тавиагүй байна” гэжээ. Энэ тухай Сингапурын “Channel News Asia” агентлаг мэлээлэв.
Ли Сяньлун цааш нь ярихдаа “Энэ уулзалтыг хаана зохион байгуулах нь Умард Солонгос болон АНУ-ын харилцан зөвшилцөж байж шийдвэрлэх ёстой асуудал” гэсэн байна.
Ким-Трампын уулзалт болох магадлалтай гэгдэж буй газруудаас Монгол болон Сингапур тунаж үлдээд байна гэж Өмнөд Солонгосын өдөр тутмын нэгэн сонин энэ долоо хоногийн эхээр мэдээлсэн билээ.
Умард Солонгосын удирдагч Ким Жөн Ун, Өмнөд Солонгосын Ерөнхийлөгч Мүн Жэ Интэй түүхэн дээд хэмжээний уулзалт хийсэнтэй холбогдуулан АНУ-ын Ерөнхийлөгч Дональд Трамп өчигдөр мэдэгдэл хийх үеэрээ “Миний бие болон Умард Солонгосын удирдагч хоорондын уулзалтыг зохион байгуулж магадгүй гэгдэж байсан газруудаас хоёр газар шигшигдэж үлдээд байгаа” гэж хэлсэн юм.