Хойд Солонгосын удирдагч Ким Чен Ун Өмнөд Солонгосын Ерөнхийлөгч Мүн Че Ин нарын түүхэн дээд хэмжээний уулзалт амжилттай болж өнгөрсөн билээ. Тэрээр хоёр Солонгосын хилийг ганцаараа явган алхаж орсон боловч түүнийг 14 бие хамгаалагч дагалдан явжээ.
Ким Чен Ун хилийн бүсэд Герман улсад үйлдвэрлэсэн тусгай зориулалтын “Maybach Pullman Guard” автомашин хөлөглөсөн ба түүнийг машиндаа суухад, машины гадна 12 бие хамгаалагч байнга дагаж байсан аж.
Мөн бие хамгаалагчид уулзалт болсон “Энх тайвны өргөө”-г урьдчилан шалгаж, Ким Чен Ун дурсгалын дэвтэрт сэтгэгдэл бичиж үлээх үед түүний суух сандал, тэнд байсан үзэг рүү ариутгах бодис цацаж ариутгасан байна.
Хойд Солонгосын удирдагч Ким Чен Ун-ийн 14 бие хамгаалагч бүгд үсээ нэгэн ижил засалттай, богино тайруулж, цэнхэр өнгийн хослол болон цагаан өнгийн цамц өмссөн байжээ.
Хэдийгээр Өмнөд Солонгос нь дэлхийн томоохон автомашин үйлдвэрлэгч орны нэгд тооцогддог боловч Өмнөд Солонгосын Ерөнхийлөгч Мүн Жэ Иний цуваанд явсан 13 машины дийлэнх нь гадаад үйлдвэрийнх байсан аж. Цувааг тэргүүлж явсан цагдаагийн цагаан өнгөтэй “Hyundai Genesis” машинаас бусад нь бүгд гадаадын машин байжээ.
Мүн Жэ Иний бие хамгаалагчид хар өнгийн таван “Cadillac Escalade” машинтай явсан нь АНУ-ын “General Motors” үйлдвэрийнх аж. Тэдний өмнө Германы “Mercedes Benz” үйлдвэрийн хоёр “Maybach” явсны нэгэнд нь Мүн Жэ Ин сууж явжээ.
Тэдний өмнө мөн Герман брэндийн хоёр ширхэг “S-Class” седан явсан бол цувааны сүүлд явсан хоёр микро автобусны нэг нь “GM Chevrolet”-ийн “Starcraft”, нөгөөх нь “Mercedes Benz”-ийн “Sprinter” байжээ.